Alahady 29 janoary 2023 — Alahady Tsotra fahefatra Mandavantaona — Taona A — Misaotra Anao aho, Raiko, Tompon’ny lanitra sy ny tany, fa nambaranao tamin’ny madinika ny tsiambaratelon’ny Fanjakanao — Evanjely Masina nosoratan’i Masindahy Matio (Mt. 5, 1-12a)
Tsy fanehoana ny maha Môizy vaovao an’i Jesoa fotsiny eto no misongadina, araka ny fomba fitantaran’i Masindahy Matio, tamin’ny Evanjely teo, fa fampianarana manoro ny endriky ny tena maha mpianatra sy mpanara-dia Azy. Izay miompana indrindra amin’ny fitsimbadihan’ny toe-javatra iainana, dia ny endriky ny fijaliana sy ny fahasambarana, mba hanitsy dia antsika mihanona amin’ny eto ivelany sy mba hananan’ireo tra-pahoriana fanantenana.
Ny tena fahasambarana no torìn’i Kristy eto amin’ity Evanjely ity, fahasambarana, tsy natao hampangetaheta fotsiny, fa lova natao ho antsika, ary tanjon’ny maha isika antsika araka ny nahariana antsika.
Ny fototr’io fahasambarana io anefa, tsy inona fa ny “Fanjakan’Andriamanitra” izay ao amintsika, eo anivontsika ary tanteraka ao amintsika. Izany hoe: mpiombona anjara amin’ny maha an’Andriamanitra an’Andriamanitra isika, noho ny fitiavany, ary mpiara-manorina aminy mba hisantarana izany dia ny ety an-tany.
Io fanjakan’Andriamanitra io anefa tsy inona fa Andriamanitra ihany. Andriamanitra maneho ny asany eo anivon’ny fiainantsika olombelona: mankahery ireo tra-pahoriana, mamoky ireo mangetaheta ny fahamarinana, mamindra fo amin’ireo manokatra ny fony mahita ny fijalian’ny hafa, mambomba ireo miezaka ny hadio fo ary mitsinjo sy mangoraka ny zanany.
Toe-piainana ahatsapana ny fitiavan’Andriamanitra ireo, ary maniraka antsika ihany koa ho mpiara-miasa aminy: tsy hanaiky ny herisetra, hampanjaka ny fahamarinana, ho tsara fo amin’ny olona rehetra ary hizaka ny anjara fijaliana noho i Kristy, mba hisian’ny tena fiadanana sy fahasambarana tanteraka eto amin’ity tontolo misy antsika ity.
Sori-dalana mandavorary ny taloha handraisana an’Andriamanitra, fototry ny tena fahasambarana ho antsika olombelona, io toriteny nataon’i Jesoa ho antsika androany io. Koa angataho Andriamanitra mba ho tanteraka amintsika sy amin’ny olombelona rehetra izany.
