Talata 17 janoary 2023 — Herinandro Tsotra faharoa Mandavantaona — Taona tsy ankasa — Raiso ny tenin’Andriamanitra; tsy ho toy ny tenin’olombelona anefa fa araka ny marina tokoa, ho tenin’Andriamanitra — Evanjely Masina nosoratan'i Masindahy Marka 2, 23-28

Manampy antsika hahazo ny hevitr’Andriamanitra manoloana ny andro sabata, na alahady, ny Evanjely izay novakiana tamintsika teo.

Andro fitsaharana amin’ny asa ny andro sabata, andro fialan-tsasatra, izany hoe andro igohana ny fitoniana tao aorian’ny hazakazaka sy fanenjehana birao, tanimbary, orinasa isan-karazany. Andro iainan’ny mpianakavy ao anatin’ny hafaliana sy fialam-boly. Azo heverina fa andro ialana amin’ny fanandevozan’ny asa aman-draharaha. Azo heverina noho izany fa andro iainana bebe kokoa ny fitiavana an’Andriamanitra sy ny fitiava-namana ny sabata. Andro anaovan-tsoa sy itandrovana ny ain’olombelona noho izany ny sabata fa tsy firaharahana na fanao tsinontsinona akory. Ary tonga i Jesoa Kristy, hanampy antsika olombelona hihaona bebe kokoa amin’Andriamanitra.

Tsara homarihina fa miteraka tahotra, fitaintainana amin’ny fanompoana an’Andriamanitra ny fitsipika henjana napetrak’ireo Farisianina mahakasika ny fomba hiainana ny sabata.