Alakamisy 7 jolay 2022 — Herinandro fahefatra ambin'ny folo mandavantaona — Andriamanitra no mampihavana an’izao tontolo izao indray tamin’ny alalan’i Kristy sy nametraka indray ny teny fampihavanana tamintsika — Evanjely Masina nosoratan'i Masindahy Matio 10, 7-15

Izay i Kristy izay, misokatra ny vavany ary manafatra ny mpianany izy. Faritany mazava tsara ny asa hanirahany azy, hamonjy ny olombelona rehetra, indrindra fa ireo sahirana, toy ny marary, ny boka, ny azon'ny demony, eny fa hatramin'ny maty aza asainy hatsangana. Tena raharaha sarotra no anirahan'i Kristy azy ireo, izany tokoa ny mitory ny fanjakan'Andriamanitra. Mitsinjo lavitra i Kristy, manafatra ny mpianany na dia eo akaikintsika mandrakariva aza izy. Maimaimpoana ihany koa fa tsy misy tambiny ny asa atao, izany hoe tsy hitadiavana tombontsoa na voninahitra, nefa ampanantenain'i Kristy kosa, izay sahaza azy, ireo irahiny manao hoe : "Mendrika ny homen-kanina ny mpiasa". Tsy avelany ho sahirana na hijaly ireo irahiny fa ankahereziny mandrakariva, ary toroany hevitra eo anatrehan'ireo tsy mandray azy.

Izany tokoa no mampiseho fa miara-miaina amin'ny mahantra i Kristy ary tsotra amin'ny fiainany. Mahalala ny manjo izay irahiny. Maniraka izy, kanefa tsy mamela ho irery ireo irahiny ; manafatra ihany koa nefa miara-miaina amin'ireo irahiny. Toa omeny tsiny ireo tsy mandray izay nirahiny, ary helohiny mihitsy aza. Izany no midika fa tsy maintsy torina ny Vaovao Mahafaly, kanefa tsy atao hahakivy ny tsy fahombiazana mitranga, fa anjaran'Andriamanitra no mamaly ireny, tsy atao hahagaga ihany koa fa manana ny fahalalany ny olombelona, nefa voafetra ihany izany eo anatrehan'Andriamanitra.