Sabotsy 08 febroary 2020 — Herinandro fahefatra mandavantaona — Evanjely Masina nosoratan'i Masindahy Marka 6, 30-34 — Ny ondriko mihaino ny feoko, hoy ny Tompo. Izaho mahalala azy, ary izy manaraka ahy.
Tsy ny asa atao ihany akory ny manara-dia na mamaly ny antson’i Kristy fa ny filazana ny natao ary ny fibanjinana sy ny fandinihan-tena ihany koa amin’izay fomba nentina nanao ny asa sy ny vokatra aterak’io fiantsoana io amin’izay irahina. Io no hevitry ny fitokanana niantsoan’i Kristy ieto Apôstôly rahefa niverina avy namita ny iraka. Nantsoiny hiala sasatra mba hanovo hery ao Aminy. Ho an’ny Apôstôly sy izay nadray antso manokana izany. Fa ho an’i Kristy, amin’ny maha Endriky ny indrafon’Andriamanitra Azy, dia ny hamonjy ny olombelona no vain-doha-draharahany.
Ry Jesoa Mpamonjy anay ô, nangoraka ireto vahoaka nanaradia anao ianao, tsy namela azy ho toy ny ondry tsy misy mpiandry ka nahafoy ny fotoana ialanao sasatra mba hampianarana azy ireo, hanomezana azy ny teninao mahavelona.
Fitiavana lehibe tokoa no nasehonao ary fampianarana tsara indrindra ho an’ireo manana sy anankinana adidy sy andraikitra, anisan’ireny ireo Ray aman-dreny sy ireo miadidy ny fiainam-bahoaka, ireo mipetraka ho lehibe sy ho tompon’andraikitra eo amin’ny sehatra maro samihafa, ireo nomena fahefana hitantana sy hitondra ny vahoaka isam’ambaratongany… koa aza avela hanao ankilabao izay iadidiany izy ireo fa mba ho eo anilany mandrakariva.
