Zoma 07 febroary 2020 — Herinandro fahefatra mandavantaona — Evanjely Masina nosoran'i Masindahy Marka 6, 14-29 — Ampianaro ahy, ry Tompo, ny soritrao; tariho amin'ny Fahamarinanao aho.
Ny filazan’i Md Marka ny nahafatesan’i Joany Batista eto amin’ity Evanjely ity, dia maneho ny fomba nanoherana ireo mpaminany teo aloha sy izay mety hanjo ihany koa ireo Apôstôly na ireo Kristianina, vavolombelon’ny finoana.
Tsy zavatra mandeha ho azy mantsy ny maha Apôstôly na ny maha kristianina fa mifaningotra mandrakariva amin’ny aina: toe-piainana tsy maintsy ijoroana ary iaretana hatramin’ny farany. Ny fiainantsika io toe-piainana io no maneho ny tena maha izy antsika eo anatrehan’Andriamanitra no sady hikatsahantsika mandrakariva an’izay notorian’i Kristy dia ny Fanjakan’Andriamanitra.
Mila olona toa an’i Joany Batista izao andro diavintsika izao: sahy hanambara sy hijoro amin’ny marina, tsy hiray tsikombakomba amin’ny ratsy ary vonona ny hijoro hatramin’ny farany na dia hihatra aman’aina aza.
Enga anie mba tsy hataontsika anaran-tsy very na ho malaza tsy hinanana toa lovian-tsahona ny maha kristianina sy ny maha mpino antsika fa mba ho tena iainantsika tokoa, mba hiarihary ny maha “Fanasina sy Fahazavana” antsika.
