Talata 21 jona 2022 — Herinandro faharoa ambin'ny folo mandavantaona — Ny teninao, ry Tompo, no fahamarinana, ankamasino amin’ny fahamarinana izahay — Evanjely Masina nosoratan'i Masindahy Matio 7, 6. 12-14

Ny fitoriana ny fanjakan’Andriamanitra sy ny fampianaran’i Jesoa dia mitondra antsika ho any amin’ny fahamasinana. Sarobidy ho antsika kristianina izany ka tsy tokony hohamaivanina sy hatao tsinontsinona. Ho an’ireo tsy mpino kosa dia mila mailo isika satria ireny no heverina fa amboa satria tsy mahalala ny maha masina ny fitoriana sy ny fampianarana izay atao. Ho antsika izay mino kosa dia tsy tokony hitompo teny fantatra, fa mila miezaka mandrakariva hatrany mba hanaja sy hitandrina ireo zava-masina ao amintsika.

Didy nomen’i Jesoa antsika ny hoe : "Tiavo ny namanao tahaka ny tenanao". Io no faniriany mba hiainantsika. Ampitoviana amin’ny tena izany ny namana ka tsy tokony hankahalaina na hanaovana herisetra mihitsy fa ho tiavina. Tian’i Jesoa hiainantsika sy ho tanterahintsika ny voalaza ao amin’ny Lalàna sy ny Mpaminany,dia ny mitady ny hahatsara sy ny hahasoa ny hafa. Didim-pitiavana àry, araka izany, no tokony hifampitondrantsika araka ny teniny : "Mifankatiava ianareo toy ny nitiavako anareo" (Jn 13, 34). Izay indrindra no lalana hidirantsika any amin’ny tena fiainana izay hita fa sarotra satria mila manadino ny tena mba hitiavana an’Andriamanitra sy ny namana. Raha mifanohitra an’izany kosa, ny lalana mankany amin’ny fahaverezana, dia ny tsy miaina ny didim-pitiavana. Araka izany àry, dia ny fomba fiainantsika ny fitiavana no hitsaran’Andriamanitra antsika.

Tompo ô, tariho hatrany hankany amin’ny lalan’ny fiainana izahay na dia sarotra aza ny mamakivaky an’izany. Amen.