Alakamisy 16 jona 2022 — Herinandro faha iraika ambin'ny folo mandavantaona — Efa nataoko hoe sakaiza ianareo, hoy ny Tompo, satria efa nambarako taminareo avokoa izay rehetra reko tamin’ny Ray — Evanjely Masina nosoratan'i Masindahy Matio 6, 7-15

Nambara tamintsika omaly fa hoe maneho ny maha isika antsika, olombelona harin-tanan'Andriamanitra, ny mifandray amin'Ilay Mpahary antsika. "Nohariany mba ho azy isika, ka tsy afaka ny tsy hifandray aminy". Anisan'ireny endri-pifandraisana ataontsika amin'Andriamanitra ireny ny vavaka. I Jesoa, Andriamanitra ivavahana sady lahimatoa amin'ny samy Zanak'Andriamanitra no mampianatra antsika mivavaka.

• Vavaka iantsoana Ilay Ray, Andriamanitra nanangana antsika ho zanany mba hahatsapantsika ny toetrantsika tsirairay ao aminy sy hiainantsika ireo toe-piainana sy hatsaram-panahy araka an'Andriamanitra, hanajana ny anarany sy hahatonga ny fanjakany ao am-pontsika sy eo amin'izao tontolo izao.
• Sy vavaka mampatoky antsika amin'ny fitiavany : fitiavana manome sakafo sahaza ny zanany, fitiavana mangoraka, miaro amin'ny ratsy sy ny mpisompatra.

Noho izany, aza atao antsirambina ny vavaka ataontsika fa ireny no :

• Hifandraisantsika am-po lalina amin'Andriamanitra.
• Mampahatsiahy sy manoro antsika koa ireo toetra sy hatsaram-panahy iainana amin'ny maha zanak'Andriamanitra.

Amin'izay dia ho tanteraka ilay fangatahantsika hoe : vavaka manova zavatra, manova fiainana, ary manamasina antsika tanteraka.