Alakamisy 2 jona 2022 — Herinandro fahafito fankalazana ny Paka — Raha niara-nitsangana tamin’i Kristy ianareo, dia ny zavatra any ambony amin’izay itoeran’i Kristy eo ankavanan’Andriamanitra no katsaho — Evanjely Masina nosoratan'i Masindahy Joany 17, 20-26
Manasa antsika handinika ity vavak’i Jesoa mba hiombonantsika ity, fa indrindra amin’izao fotoana ahitana ady, fankahalana, fisaraham-bazana ary fanavakavahana amin’ny lafiny rehetra (ara-bolokoditra, ara-pinoana, ara-teny…). Tena mila an’io fiombonana io isika raha te hahita fahasambarana sy famonjena. Miaina ao anatin’ny fahasambarana isika rehefa mahatsapa fiombonana ao anatintsika sy ety ivelany. Karapanondron’ny kristianina ihany koa ny fiombonana ka noho izany manana adidy ny hitandro sy hikatsaka ary ny hiaina ao anatin’izany izy.
Lazain’i Jesoa fa raha te hahazo an’izany isika dia mila mahita ny fifandraisam-pitiavana misy eo amin’Andriamanitra Ray sy ny Zanaka noho ny herin’ny Fanahy Masina. Mila manaiky ny honenana sy hiasan’izany fitiavana izany anefa isika fa izany no hampiova ny fiainantsika tanteraka.
Mila zaraina amin’ny hafa ihany koa izany fiombonana izany rehefa avy novain’ny fitiavan’Andriamanitra isika tsirairay avy.
