Alakamisy 12 mey 2022 — Herinandro fahefatra fankalazana ny Paka — Nahita Ahy ianao ka nino; fa sambatra izay tsy nahita ka mino — Evanjely Masina nosoratan'i Masindahy Joany 13, 16-20

Ry havana ; rehefa avy nanazava i Jesoa fa tenan’ny Ray izy fa iraky ny Ray, dia toy izany koa ny mpianany, tenan’i Kristy maniraka azy ireo. Izany rahateo no fampianaran’ny Konsily Vatikana faharoa ka averin’ny Katesizy : Sakramentan’ny Ray i Jesoa Kristy ary Sakramentan’i Kristy ny Eglizy. Avy nanasa ny tongotry ny mpianany moa i Jesoa no miteny eto ; toa te hilaza izy hoe tahaka ny nikarakarako sy nanompoako anareo no hikarakarao sy hanompoy koa ny olombelona fa izany no ahafantarana fa mpianatro ianareo.

Eo am-panatontosana izany iraka izany dia tsy maintsy hisy sedra mafy ; iray tamin’ny mpianany aza no namadika an’i Jesoa. Ho sendraina toy izany koa isika mpianany, ho lavin’ny olona, hohenjahina. Firifiry tokoa moa no mandao ny finoana ankehitriny ; endrika fandavana an’i Jesoa daholo ireny ; mampalahelo ; mety manafintohina ; kanefa izay haharitra hatramin’ny farany no ho voavonjy.

Tsy izay endrika fandavana no hodinihantsika fa ny firaiketam-pontsika aminy. Ndeha hanamafy ny finoana sy hanavao isan’andro ny fanoloran-tenantsika ho Azy. Amen.