Alahady 8 mey 2022 — Alahady fahefatra fankalazana ny Paka — Izaho no Mpiandry ondry tsara, hoy ny Tompo, sady mahalala ny ondriko Aho no fantany koa — Evanjely Masina nosoratan'i Masindahy Joany 10, 27-30
Ry kristianina havana ; isaky ny alahady fahefatry ny Paka ny Eglizy dia mankalaza an’i Jesoa Kristy Mpiandry ondry tsara. Ampianarin’ny Litorjia antsika amin’izany fa manangona izay miahaka Izy ary mitahiry izao miangona. Hatrany amin’ny Testamenta Taloha dia efa oharin’ny Tenin’Andriamanitra amin’ny andian’ondry ny vahoaka Israely, ilay vahoaka voafidy. Entina ilazana fa manan-tompo io vahoaka io fa tsy mpirenireny na dia, na haolo, vahoaka tiana ka mahasaro-piaro ny Tompo. Tsy Israely ihany anefa fa ny olombelona rehetra no irin’ Andriamanitra ho andian’ondry tokana, anaty vala tokana ary manana an’i Jesoa Mpiandry tokana.
Manambara ny Tenany i Jesoa hoe "Izaho no Mpiandry ondry hotsaroantsika". Aoka hotsaroantsika fa fito ny tenin’i Jesoa milaza hoe izaho no [fahazavan’izao tontolo izao, fananganana sy fiainana, mofon’aina, lalana sy fahamarinana ary fiainana, …] Izy no manambara ny tenany vao mahalala azy isika.
Matoanteny efatra enti-miaina :
• MIHAINO : fototry ny fifandraisana ny fihainoana, fifampihainoana. Fahaiza-miaina sy fahalalam-pomba, porofom-pitiavana mihitsy aza ny fihainoana. Fitiavana an’Andriamanitra ny fihainoana Azy, fitiavantsika ny Mpiandry antsika no ihainoantsika Azy.
• MAHALALA : amin’ny fampianaran’i Masindahy Joany dia mifandrohy hevitra ny MINO, TIA, MAHALALA. Raha te hahalala an’i Krsisty dia mino Azy, tia Azy.
• MANARAKA : manara-dia an’i Kristy no tanjona. Izay no dikan’ilay sary famantarana an’i Kristy mpiandry ondry. Izy Mpiandry no eo aloha ; ny ondry manaraka Azy satria mino, mahalala ary tia Azy.
• MIOMBONA, MIRAY : ny tanjon’ny Ray dia andian’ondry tokana anaty vala tokana manana an’i Kristy Mpiandry tokana.
Fotoana ivavahana ho an’ny fiantsoan’Andriamanitra koa ny alahadin’ny Mpiandry ondry tsara. Ka italaho amin’ny Ray isan’andro mba hanirahana mpiandry mahatoky hikarakara ny andian’ondriny. Amen.
