Alakamisy 5 mey 2022 — Herinandro fahatelo fankalazana ny Paka — Tsy maintsy hijaly i Kristy sy hitsangan-ko velona; ary hiditra amin’ny voninahiny — Evanjely Masina nosoratan'i Masindahy Joany 6, 44-52

Mampahafantatra ny olona rehetra i Jesoa mba hanao antom-pivelomana ilay mofo nidina avy any an-danitra. Ny mofo avy any an-danitra dia ny nofony ho fiainan’izao tontolo izao, izy mofo velona nidina avy any an-danitra, velona satria manan’aina, fa velona koa satria loharanon’aina. Avy amin’ny fihinanana azy no ahazahoanstika ny aina, dia tsy ilay aina hitambarana amin’ny zavaboahary ilay mety maty, fa ilay aina iombonana amin’Andriamanitra ilay tsy mety maty intsony.

Ny fiainan’i Jesoa no natolony ho aina mamelona an’izao tontolo izao. Hain’Andriamanitra ny mitondra ny zava-drehetra. Ny nahamaro ny apostoly sy ny fiparitahan’izy ireo tamin’ny toerana maro, izany fiparitahan’izy ireo izany dia tsy hahatonga azy ireo ho vavolombelona hatreo Samaria ihany fa hatrany am-para vazan-tany sy eran’izao tontolo izao.