Alahady 17 aprily 2022 — Alahadin'ny Paka. Nitsanganan'ny Tompo ho velona — Efa voavono i Kristy izay Paka ho antsika ao amin’ny Tompo — Evanjely Masina nosoratan'i Masindahy Joany 20, 1-9
Paka ny andro, fitsanganan'i Kristy ho velona, nandresy ny fahafatesana, manambara fiainam-baovao izay asehon'ny teny hoe : "Andro voalohan'ny herinandro". Ny mpanoratra ny Evanjely efatra dia samy manaiky io tranga io, ary te-hanambara hoe : tontolo vaovao no manomboka, fahariana vaovao no miseho. Ny fisian'i Marie Mdaleine nandeha vao maraina voalohany tany am-pasana ihany koa dia manambara io fiainam-baovao io. Tsy kisendrasendra na fanahiniana ny fisian'ity vehivavy ity tamin'ny fitsanganan'i Kristy ho velona, fa azo lazaina ho famantarana manan-danja tokoa, satria ny vehivavy eo amin'ny fiainanan'ny olombelona dia loharano nisehoana, amin'ny maha reny azy, manambara io fiainam-baovao io, fahariana vaovao. Koa na dia mbola tsy nino ny zava-niseho aza i Marie Madeleine, dia efa famantarana sahady fa fiainam-baovao, fandresena no ao amin'i Kristy nitsangana ho velona, ny Paka ihany koa moa dia midika hoe "fandalovana". I Marie aza no voalaza fa voalohany nanapritaka ny zava-niseho. Ny olona voalohany nanambarany izany dia i Simona Piera sy i Joany, ilay mpianatra malalan'i Jesoa, izay samy tsy mbola nino izay voalazan'i Jesoa taminy.
Miainga amin'izay voalazan'ny Vaovao Mahafaly izay àry, no hanambarana sy hanamafisan'ny Fiangonana amintsika fa fiainam-baovao ho antsika ny fitsanganan'i Kristy ho velona, satria io no loharano sy fototry ny finoantsika, indrindra ho antsika krisitianina : I Jesoa tonga nofo, nijaly sy maty teo amin'ny Hazofijaliana ary nandresy ny fahafatesana, nitsangan-ko velona. Famantarana ihany i Marie Madeleine sy i Piera ary i Joany, fa i Kristy nitsangan-ko velona no tena votoatiny. Koa mila manavao sy manamfy io finoantsika io isika amin'izao Paka izao, tahaka ny efa nanambarantsika azy tamin'ny fomba manetriketrika nandritra ny litorjia natrehintsika alina.
