Talata 5 aprily 2022 — Herinandro fahadimy amin'ny Karemy  — Ny tenin’Andriamanitra dia voa afafy, i Kristy no mpamafy; izay rehetra mahita Azy dia honina ao aminy mandrakizay — Evanjely Masina nosoratan'i Masindahy Joany 8, 21-30

Mitohy hatrany ny fifandirana nisy teo amin’i Jesoa sy ireo Jody izay tsy nety nino Azy. Teto dia mahakasika ny fahafatesana no resaka. Ho an’i Jesoa mantsy dia efa safidiny mihitsy sady sitrapon’ilay Ray naniraka Azy ny ho faty mba ho famonjena ny olombelona rehetra. Fa ho an’ireo Jody kosa dia ho faty ao anatin’ny fahotana noho ny tsy finoany an’i Jesoa. Tsy mety mino mantsy izy ireo fa Izy no Mesia Zanak’Andriamanitra. Isika ihany koa rehefa tsy mino Azy dia ho faty ao anatin’ny fahotana. Ny finoana tokoa mantsy no nitondra antsika ho any amin’ny famonjena. Ary izay no fanambarana nentin’i Kristy ho an’ireto Jody izay tsy nenty nino Azy ireto.

Amin’izao vanim-potoana ny Karemy izao àry dia ilaina mandrakariva ny mamelombelona ny finoantsika amin’ny alalan’ny vavaka sy ny fialana amin’ireo toetra ratsy. Tano mafy àry ny finoantsika an’i Jesoa maty sy nalevina ary nitsangan-ko velona mba hahafahantsika miara-mandresy miaraka Aminy.

Tompo ô,omeo finoana izahay hankahery anay osa sy malemy. Amen.