Zoma 24 janoary 2020 — Herinandro faharoa mandavantaona — Evanjely Masina nosoratan'i Masindahy Marka 3, 13-19 — Efa nataoko hoe sakaiza ianareo, hoy ny Tompo; satria efa nambarako taminareo ny rehetra reko tamin'ny Ray.
Efa maro ireo fampianaram-pinoana azaontsika momba ny fiantsoana ireo Apôstôly. Isan'ny zava-dehibe nialoha izany fiantsoana izany ny nitokanan'i Jesoa tany an-tendrombohitra, toerana avo, mangina sy tony ka manampy amin'ny fivavahana. Ny dikan'izany dia hoe: ankino amin'Andriamanitra ny fiainana. Tsy ny zava-dehibe ihany, fa izay rehetra atao, ny fiainana manontolo. Manaraka izany, zava-dehibe ny mitokana, mba maka saina irery, mainka moa ny hoe hivavaka manokana. Aoka tsy hihanona fotsiny amin'izay iombonana, na any an-tokantrano io na any am-piangonana, fa manandrata ny fanahy, mivavaha manokana ho mari-pitokisana an'Andriamanitra.
Rahefa izany, dia "niantso izay tiany hankeo aminy i Jesoa". Ny fiantsoan'Andriamanitra izany dia sitrapon'Andriamanitra, safidin'Andriamanitra. Andriamanitra no manao ny dingana voalohany. Ilay teny hoe "izay tiany" dia midika hoe manam-pahefana tsy toha Izy, masi-mandidy amin'izay ataony ary tsy miankina amin'izay fahamendrehan'izay antsoina. Roa ambin'ny folo no ilainy, famantarana zava-dehibe, dia ny fanorenana Israely vaovao, handavorariana ilay vahoaka voafidy roa ambin'ny folo foko fahiny.
Nantsoiny hiara-mitoetra aminy ireo. Tsy avy hatrany dia asa, fa fiainana miaraka amin'i Jesoa aloha. Ary arakaraka ny hiaraha-mitoetra aminy no hanahafana azy. Fanamasinan-tena aloha no atao hoe fiantsoan'Andriamanitra, satria raha tsy masina, tsy afaka hanamasina. Nirahina amin'izay ireo hitory teny sy nanao zavatra hafa. Laharam-pahamehana ny Tenin'Andriamanitra, satria ny Teny no fanorenana.
Notononina tsirairay ny anaran'ny Apôstôly tao amin'ny Evanjely teo, mba hilazana amintsika fa ny tsirairay amin'ny maha-izy azy no antsoina. Amin'ny anaran'ny tenany koa no mamaly fa tsy mialokaloka ao anatin'ny betsaka. Manam-pikasana ho an'ny tsirariay amintsika Andriamanitra. Miantso Izy isan'andro ary aoka isika hamaly hoe: "Inty aho, iraho aho".
