Alarobia 19 janoary 2022 — Herinandro faharoa mandavantaona — Velomy araka ny hatsaram-ponao aho, mba hitandremako ny Fanambarana avy amin’ny vavanao — Evanjely Masina nosoratan'i Masindahy Marka 3, 1-6

Mitohy hatrany ny fifandirana eo amin’i Jesoa sy ireo Farisianina mpanenjika Azy. Eto dia mahakasika indray ny fanasitranana amin’ny andro Sabata. I Jesoa dia tsy mikatsaka afa-tsy ny famonjena ny olombelona, ary ao anatin’izany ny fanasitranana ara-batana izay hitantsika eto, ny an’ireo Farisianina kosa dia ny fitandremana ny lalàna ara-bakiteny sy ambonin’ny zavatra rehetra mihitsy.

Mampianatra antsika àry eto i Jesoa fa tsy mifidy andro na fotoana ny fanaovana asa soa sy ny famonjena ny aina, eny na dia amin’ny andro Sabata aza. Ary efa nampianariny fa ny didy lehibe indrindra dia ny fitiavana an’Andriamanitra sy ny fitiavana ny namana. Ny fitiavana araka izany no mitondra antsika ary amin’ny fanatanterahana ny lalàna. Fitiavana izay manokatra ny fontsika fa tsy sanatria akory manakombona azy.

Tsara ny manamarika fa i Jesoa akory tsy mba nandika na nanakiana mihitsy ny lalan’i Moizy, izay hitompoan’ireto Farisianina fatratra. Izy àry isan’ireo nitandrina izany mihitsy : hitantsika tamin’ny Evanjely teo ary ny fakanesana tany amin’ny Sinagoga amin’ny andro Sabata. Fa ny nampalahelo Azy dia ny fomba fanatanterahan’ny lalàna ataon’ireo Farisianina izay tsy mba manome toerana kely akory ny fitiavana ny namana sy ny famindram-po.

Aoka àry ny finoana izay ao anatintsika ao sy ny vavaka izay ataontsika mba hisokatra any amin’ny fitiavana izay natoron’i Kristy. Fa tsy sanatria akory ny lalàna na ny fahazarana no mibaiko ny fontsika hanao izany.