Alatsinainy 10 janoary 2022 — Herinandro voalohany mandavantaona — Sambatra ireo mitana ny tenin’Andriamanitra amin’ny fo tsara sy mahitsy, ka mitandrina azy sy mamoa amin’ny faharetana — Evanjely Masina nosoratan'i Masindahy Marka 1, 14-20

Indro efa eo anivontsika ilay Mesia nialohavan'i Joany, nefa efa tonga talohany. Indro tonga miaraka aminy ny fanjakan'Andriamanitra, antony nakany nofo sy niarahany nonina tamintsika olombelona. Izy ilay Vaovao Mahafaly nantenain'ny maro, santatr'ilay tena hasambarana lavorary sy tonga lafatra ao amin'Andriamanitra. Io Mesia io no mitaona antsika rehetra ho ao amin'izany fanjakan'Andriamanitra izany, ary mampianatra antsika koa ny fomba hidirana ao, dia : ny fibebahana, izay fialana amin'ny ratsy sy izay tsy araka an'Andriamanitra, hanova famindra hibanjina mandrakariva ny fiainana mandrakizay. Ary ny finoana ny Evanjely, mba tsy handeha amin'ny toetra sy ny fomba maha olona fotsiny isika, fa handray an'Andriamanitra ao am-po sy eo amin'ny fiainana, hanantena azy sy hiombom-piainana aminy tanteraka. Izany hoe, hisokafan'ny fiainantsika ho any amin'Andriamanitra sy handovantsika ny fanjakany.

Raha tsiahivina dia antony nakany nofo toa antsika izany, antony niantsony ireo mpianany ihany koa ho mpiara-miasa aminy hamonjy ny olombelona rehetra. Anjarantsika àry, ny maneho fa efa eo afovoantsika, miara-monina amintsika Andriamanitra, amin'ny alalan'ny Zanany. Anjarantsiia ny mihaino sy ny mankato azy, ilay miantso antsika isan'andro vaky, hibebaka sy hiaina ny Evanjely, mba ho tena mpanara-dia sy mpiara-miasa aminy isika.