Zoma 17 desambra 2021 — Ianao Filohan’i Davida izay mamoha ny varavaran’ny fanjakana tsy manam-pahataperana, avia ary tsoahy amin’ny fatorany ny voagadra tazonin’ny haizina — Evanjely Masina nosoratan'i Masindahy Matio 1, 1-17

Ny Evanjely nohenointsika dia manambra amintsika fa i Jesoa Kristy dia tena Andriamanitra ary tena Olombelona marina tokoa. Nanana niadohany Izy. Ary tsy afaka sarahana ny maha zanak’Andriamanitra sy ny maha olombelona azy fa sady Andriamanitra izy no olombelona. Hatrany am-piandohana Izy no "Ilay izay nohamasinin’ny Ray sy nirahiny teto amin’izao tontolo izao" (Jo 10, 36), notorontoronina ho masina tao an-kibo virjinin’i Maria. Nantsoin’Andriamanitra i Josefa "hampakatra an’i Maria ho vadiny", izay "nitoe-jaza tamin’ny Fanahy Masina" (Mt 1, 20), mba ho i Jesoa "ilay antsoina hoe Kristy" izay hateraky ny vadin’i Josefa, no ilay Mesia taranak’i Davida (Mt 1, 16).

Raha fitinina ity Evanjely dia manampy be dia be antsika hibanjina ilay Andriamanitra tonga niara-monina tamintsika. Araka ny nolazain’i Masindahy Joany hoe : "ary ny teny dia tonga nofo, ka nonina taty amintsika, ary nibanjina ny voninahiny izahay, dia voninahitra tahaka izay zakain-janaka lahitokana avy amin’ny Rainy, sady feno fahasoavana sy fahamarinana izy."