26 desambra — I Masindahy Étienne dia iray amin'ireo diakra fito nofidian'ny Apôstôly, mba hanampy azy ireo tamin'ny asa fanirahana sy ny fitoriana natony. Ao amin'ny boky mitantara ny Asan'ny Apôstôly toko fahenina sy fahafito no ahitantsika ny tantaram-piainany amin'ny antsipiriany, amin'izany iraka nataony izany, na ny nifidianana azy ho diakra, na ny nisamborana azy.

Raha fehezina dia tsy nihambahamba mihitsy i Étienne, niady hevitra tamin'ireo Jody, ary naneho tamin'izy ireo fa i Jesoa, ilay nofantsihana, no tena Mesia ambaran'ny Soratra Masina. Very hevitra noho ny fahendrena sy ny fahasahian'i Étienne ireo tao amin'ny sinagaoga, ka nampirisika ny olona hanohitra an'i Étienne, sy hanendrikendrika azy ho niteny ratsy an'Andriamanitra sy i Moizy. Nomen'izy ireo fo ihany koa ny loholona sy ny vahoaka, ka nisambotra an'i Étienne sy nitondra azy teo amin'ny Sanedrina. Fa teo indrindra no nanaovan'i Étienne ny lahateny fampianarana momba ny famonjena nentin'i Jesoa Kristy. Izay no nahatonga azy ireo hisafaoka sy hihidy vazana, fa i Étienne kosa, feno ny Fanahy Masina, nimbanjina ny lanitra ary nahita ny voninahitr'Andriamanitra sy i Jesoa nitsangana teo ankavanan'Andriamanitra, ka nanao hoe : "Indro hitako ny lanitra misokatra, mbamin'ny Zanak'olona mitsangana eo an-kavanan'Andriamanitra". Tezitra noho izany ireto lehiben'ny Jody ka nihoraka sy nitondra an'i Étienne, nivoaka ny tanana ary nitora-bato azy. Nandritra izany i Étienne dia nivavaka sy nanolotra ny fanahiny tamin'Andriamanitra sy nanao hoe : "Tompo ô ! Aza tananao ny hadisoany". Rehefa vita izany vavaka izany dia nodimandry tao amin'ny Tompo izy. I Saoly no vavolombelon'izany rehetra izany, heverina fa ny fahitan'i Saoly io naha martiry an'i Étienne io no nahatonga azy hibebaka, ka lasa hoe Paoly.