22 desambra — Niaina tamin'ny taonjato fahefatra i Masindahy Flavien, préfet de Rome tamin'ny andron'ny amperora Julien izy io. Ireo amperora kristianina dia nankasitraka ny fahendren'ity olomasina ity ka nahatonga azy ireo nanome andraikitra lehibe tao an-tanana.
I Masimbavy Daphrose no vadin'i Flavien ary i Masimbavy Bibiane sy i Démitri no zanany. Samy maty martiry avokoa ireo vady aman-janany ireo noho ny fifikirana tamin'ny finoana kristianina. Nasehon'i Flavien tamin'ny asa rehetra nataony fa mpanompon'i Jesoa Kristy izy, ary ny faniriany dia ny haneken'ny olon-drehetra ny Tompo, sy ny hitsaohana Azy.
Rehefa niezaka namerina ny arianisme ny amperora Constance, dia nitoetra tsy azo nohozongozonina tamin'ny finoana katôlika i Flavien. Resy lahatra izy fa tsy misy antony hiantsoana hoe Zanak'Andriamanitra ny Mpamonjy, raha tsy miaiky azy ho Andriamanitra aloha, izay tsy misaraka. Rehefa tonga teo amin'ny fanjakana ny amperora Julien, dia nopotehiny ny fivavahana kristianina, naveriny ny fanenjehana nataon'i Dèce sy i Aurélien, Dioclétien sy Maximien. Tsy nampihontsona an'i Flavien anefa izany fa nasehony hatrany ny fitiavana natoron'ny Evanjely azy. Raha sendra nisy kristianina novonoina noho ny finoana ohatra, dia izy no maka ny nofo mangatsiakan'ireo ary mitondra izany any an-trano sy mandevina amim-panajana.
Tsy tantin'ny amperora ny naheno ny fitiavam-bavaka nananan'i Flavien. Tsy nasiany lanjany akory ny taonany, ny fahendreny, ny asa vitany teo amin'ny fanjakana, ny toe-panahiny mendri-panajana, ny fahandrianany. Nomen'ny amperora Julien baiko i Apronien, haka ny toeran'i Flavien ka hisambotra azy sy hanasazy azy mafy raha tsy miala amin'ny fivavahana kristianina sy tsy manolotra sorona amin'ny sampy izy. Notanterahan'i Apronien ny baiko. Rehefa hitany anefa fa aleon'i Flavien very fananana sy aina toa izay hiala amin'ny finoana, dia nasian'izy ireo tomokavatsa tamin'ny vy ny andriny, ho marika fa andevo, ary nalefany sesitany tany Acquapendente tao Toscane. Noraisin'i Flavien ho fodiana an-tanindrazana ny fandefasana azy an-tsesitany noho ny anaran'i Jesoa Kristy. Ny vavaka no nandaniany ny androny tany, izay nisavany ny lalana ho any amin'ny Fanjakan'ny Lanitra. Teo am-pivavahana i Flavien no nantsoin'ny Ray handray ny valisoany any an-danitra.
