10 ôktôbra — Teraka tany Grèce tamin'ny fiantombohan'ny taonjato fahafito, avy amin'ny fianakaviana gauloise na bèlge i Ghislain. Tao aorian'ny nandalinany haisoratra tao Athènes dia niditra tao amin'ny fikambanana manaraka ny fitsipi-piainan'i Masindahy Basile izy, ary nohamasinina ho pretra. Nisy nilaza fa arseveka tao Athènes ihany koa izy.
Nipetraka tao Rome i Ghislain mba hivavaka tany amin'ny fasan'ireo kristinanina voalohany, dia ny fasan'i Masindahy Pierre sy Paul izany. Ny taona 648, nalefan'ny papa tany Belgique izy niaraka tamin'i Masindahy Lambert sy Bellère ary tany Maastricht no nifankahalalany sy nananany ho namana an'i Masindahy Amand. Naniry ny hiaina ny fiainan'ny mpanirery i Ghislain. Nitoetra teo amoron'ny renirano izy, ary nanorenany trano kely ho azy sy ny mpianany tao. Nanorina trano fitokana-monina tao amin'ny tananan'i Ursidongus izy, izay nitondra ny anarany taty aoriana. Nisy akony ratsy tany amin'ny Albert, eveka tao Cambrai ny asa fitoriana nataon'i Ghislain, ka nampiantsoina sy nalaina am-bavany ny momba izany izy, fa hoy izy hoe : "Grika aho, ary kristianina. Teraka tao Athènes ary nateraka fanindroany tamin'ny batemin'i Jesoa Kristy. Tao Roma aho, ary noho ny baiko avy amin'Andriamanitra dia tonga amin'ity tanana ity aho, Ursidongus. Niasa tamin'ny tanako aho ary te hanorina toeram-pivavahana hanajana an'i Masindahy Pierre sy Paul, ka mangataka ny alalana avy aminao hanohy izany". Teo dia niaro an'i Ghislain ny papa ka ny 653 no notsofina rano ny fiangonany. Maro no nanara-dia ny aim-panahin'i Ghislain, anisan'izany ireo mpirahavavy nantsoina hoe Aldegonde sy Waudru. Nodimandry ny taona 658 i Ghislain, ary nalevina tao amin'ny fiangonana nisy ny trano fitokana-monina naoriny, izay nanaovany fahagagana maro. Ny taonjato fahasivy no tena nanomboka ny fanajana azy.
Indray andro, raha handeha hitatitra ny asany tany amin'ny eveka i Ghislain, rehefa avy tany Cambrai izy dia nahita ny châtelain sahirana sy very hevitra satria satria saro-piterahana ny vadin'ity rangahy ity ka efa teo am-bavahaonan'ny fahatesana mihitsy. Nomen'i Ghislain an'ilay rangahy ny fehikibony ary nataon'io lehilahy tamin'ny kibon'ny vadiny. Sitrana ilay ramatoa ary teraka soa aman-tsara. Nataon'i Ghislain batemy io zaza io ary nomeny anarana ho Baudry.
