18 jolay — Zafikelin’i Radbod i Frédéric. I Masindahy Richfried no nanabeaza azy, eveka tao Utrecht izy io. Nohamasinina ho pretra izy ary fanta-daza tamin’ny fifehezan-tena mafy. Nolaviny ny fifidianana azy ho eveka tao amin’ny diosezy.
Ny olona tao Frise anefa nahafantatra tsara sy tia azy, indrindra fa tamin’ny hafanam-po tamin’ny fitoriana ny Vaovao Mahafaly sy ny fahaizany mampianatra. Izay indrindra no nahatonga an’i Louis le Pieux niangavy azy mba hanaiky ho eveka tao Utrecht izay toerana banga hatramin’ny nahafatesan’i Richfried. Ny taona 1820 i Frédéric no nandimby an’i Masindahy Richfried.
Niaina tao amin’ny lapan’i amperora Louis le Pieux, zanak’i Charlemagne, izany i Frédéric. Nanana andraikitra lehibe tamin’ny fiaraha-miasa tamin’ny amperora izy tamin’izany, mandram-pahatongan’ny fotoana nampakaran’ny amperora an’i Judith de Bavière. Nanan-janaka lahy izy ireo ilay nantsoina hoe Charles le Chauve. Namporisihan’ny reniny moa izy io hitaky ny anjara fananany sy ny lovany ka tonga adin’izy mianaka. Izany hoe ny adin’i Charles sy Louis. Tsy zakan’i Judith ny fanamarihana nataon’i Frédéric ny amin’ny fitondran-tena tsy mety ataony ka nankahalain’i Judith fatratra io eveka io. Ka izany indrindra no nanirahany olona hamono ity eveka ity rehefa avy nanolotra ny Sorona Masina ny 18 jolay 883. Mbola afaka namela ny helok’ireo namono azy i Frédéric talohan’ny nialany aina.
Nandray anjara tamin’ny kônsily tao Mayence ny 829 i Frédéric, ary tamin’izany no nanazavany ny fitsipiky ny fanambadiana kristianina. Nanohy ny fitoriana ny Vaovao Mahafaly niaraka tamin’i Adulf tany avaratr’i Utrecht izy. Nanohitra ny hevitr’i Arius sy ireo hevitra mivohy ny mahamety ny fanambadian’ny mpihavana. Namangy tsy tapaka ny kristianina tao amin’ny dioseziny izy, ary nitondra fanasitranana sy fanohanana ara-panahy na ara-pitaovana indrindra fa ireo tany amin’ny nosy Walcheren izay nanjakan’ny fitondran-tena tsy mendrika. Nanoratra boky momba ny fiekem-pinoana izy, izay namintina ny fampianaran’ny Fiangonana momba ny Trinite Masina. Ho azy moa no nanoratan’i Raban Maur ilay momba an’i Josué ny taona 834. Matetika dia aseho aminy sarina lehilahy miaraka amin’ny sabatra roa izay mitrobaka eo amin’ny vatany i Masindahy Frédéric.
