12 marsa — Mety ho gaga ianao fa matetika miverimberina ny anarana hoe Grégoire. Maro tokoa ireo olomasina mitondra ny anarana hoe Grégoire fa amin'ity andro anio ity dia i Grégoire Lehibe na ny papa Grégoire le Grand no ankalazain'ny Fiangonana.
I Masindahy Grégoire le Grand dia papa niaina tamin'ny taona 540 ka hatramin'ny 604. Zanaka sénateur izy ary olomasina ihany koa ny nenitoany dia i Masimbavy Tharsille. Antsoina hoe lehibe izy, ary rariny izany satria lehibe izy noho ny fikarohana vitany, ny fahamasinana nananany. Lehibe izy noho ny soa nataony teo amin'ny fiaraha-monina ary lehibe izy noho ny fahamendrehany teo amin'ny naha eveka azy, teo amn'ny maha iraka manokan'ny Ray masina azy satria efa Légat izy ary indrindra indrindra teo amin'ny naha papa azy.
Teraka tao Roma i Grégoire le Grand, ben'ny tanana izy ary nikarakara ny mahantra. Taty aoriana dia lasa toeram-pitsaboana sy trano fitokana-monina ny lapan'ny tanana. Zavatra iray ihany no mba notazoininy tamin'ireo fananany mirentirenty, tamin'izany fotoana izany, dia tsy inona fa lovia volafotsy izay nataon'ny reniny ho fanaterana sakafo ho azy tao amin'io trano fitokana-monina izay naoriny io, nefa nomeny olona ihany koa io lovia io taorina kely fa nisy olona nila vonjy taminy. Tamin-kafanam-po no namakian'i Grégoire ny boky masina ary tsy latsa-danja noho izany koa ny fiaretana amin'ny vavaka sy ny fampijalian-tena nataony.
Indray andro nahita ireo ankizy tsara tarehyavy any Angleterre, namidy teo an-tsena izy. Mbola tsy mpino moa ireo tamin'izany ka nangataka tamin'ny papa i Grégoire mba hitory ny Vaovao Mahafaly any amin'ireo mponina ireo, fa noho ny fimonomononin'ny olona tao Roma dia tsy nalefa indray izy. Rehefa tonga teo amin'ny Fiketrahana masina àry i Grégoire le Grand dia nataony vaindohan-draharaha ny fitoriana ny Vaovao Mahafaly tany Angleterre. Anisan'ny nampalaza azy ihany koa ny fanavaozana ny fombam-pivavahana, teo ihany koa ny fanatsarana ny hiram-piangonana. Maro ny fampianarana sy ny toriteny nosoratany ary azo heverina fa fotoana namokatra, nampivelatra ny Fiangonana ny fotoana naha teo amin'ny Fiketrahana masina azy.
Nodimandry ny 12 marsa 604 i Grégoire le Grand. Anehoana azy ny sarin'ny eveka mihaino voromailala miteny aminy eo amin'ny sofina. Izy dia natokana ho mpiaro ireo chantres.
