16 febroary — I Masimbavy Julienne dia anisan'ireo malaza tamin'ireo vehivavy virjiny maty martiry noho ny finoana an'i Kristy tao Nicomédie. Nisy tovolahy iray avy amin'ny fianakaviana ambony nangataka azy ho vady. Nampahafantariny an'io tovolahy io fa kristianina izy ary tsy hanambady afa-tsy kristianina.

Nolazain'io tovolahy io tamin'ny rain'i Julienne izany, marihana fa ny ray aman-drenin'i Julienne dia mpanompo sampy, tezitra noho izany ny rainy fa tsy nahoany izany fa naleony niharitra ny kapoka tao an-tranon-drainy, ny fonja sy ny vy toa izay hanambady olona tsy mpino.

Nilaozan-drainy i Julienne, ary ilay tovolahy izay lasa préfet tao an-tanana dia nitory azy tany amin'ny fitsarana. Na inona na inona fandrahonana sy fanarabiana dia tsy niova hevitra mihitsy i Julienne na dia hodoram-belona sy omena hoanin'ny biby aza. Tezitra noho izany ity mpitsara ka nandratra azy tamin'ny felaka sy nanantona azy tamin'ny volony nandritra ny fotoana maharitra. Nodorana tamin'ny vy mahamay sy mivoara mena koa izy fa tamin-kerim-po tanteraka no niharetan'i Julienne izany fangirifiriana izany. Naverina tany am-ponja izy ary nivavaka fa mbola demony niseho naka fanahy azy fa niantso an'Andriamanitra i Julienne hiaro azy ka nisy feo avy any an-danitra nanao hoe: "Julienne, mahereza, miaraka aminao aho".

Sitrana tanteraka i Julienne taorian'izay ka gaga ilay tovolahy nahita azy tao amin'ny fitsarana, olona salama vatana sy meva endrika ery, hany heriny dia nanipy an'i Julienne tao anaty fatana fa tsy nahazo azy anefa ny afo. Efa nahatratra 500 ny olona nibebaka noho io fahagagana niseho tamin'i Julienne io. Narotsaka tao anaty menaka mangotraka izy fa tsy nampihontsona azy izany, farany, notapahana ny lohany.