Zoma 23 jolay 2021 — Herinandro fahenina ambin'ny folo mandavantaona — Sambatra ireo mitana ny tenin’Andriamanitra amin’ny fo tsara sy mahitsy, ka mitandrina azy sy mamoa amin’ny faharetana — Evanjely Masina nosoratan'i Masindahy Matio 13, 18-23

Ny ampahana Evanjely natolotry ny Fiangonana androany dia manohy ny tamin’ny alarobia afakomaly. Fanoharana nataon’i Jesoa tamin’ny vahoaka teo amoron-dranomasina mahakasika ilay mpamafy. Novoaboasan’i Jesoa mazava ny fanoharana ka ny voa afafy dia ny tenin’Andriamanitra izay afafy ao am-pon’ny olona, ka miankina amin’ny toerana hitsimohany sy haniriany no mampahavokatra azy.

1. Ireo voa latsaka teny amoron-dalana dia ireo olona nandray ny tenin’Andriamanitra nefa tsy nandalina sy tsy miaina azy ;
2. Ireo voa latsaka tany amin’ny tany be vato dia ireo nandray ny tenin’Andriamanitra nefa tsy nahari-pery sady tsy mahazaka fanenjehana ;
3. Ireo voa latsaka tany anaty tsilo dia ireo izay nandray ny tenin’Andriamanitra nefa tsy mikatsaka ny zavatra any an-danitra ;
4. Ny voa latsaka tany anaty tany lonaka dia ireo nandray ny tenin’Andriamanitra ka nanao azy ho fiainana ; nankatoa, nitandro sy niaina izany.

Ry havana, misy hiran’ny mpanakanto hoe tsy mamela anao hipetraka ny Evanjely, tsy mamela anao hipetrapetraka ny Evanjely. Raha tsorina dia hoe tsy ampy ny mandray fotsiny ny tenin’Andriamanitra fa tsy maintsy alatsaka ao am-po. Ezahana iainana ka atao fototra iorenan’ny fiainana. Aoka àry isika, ho hetsaky ny tenin’Andriamanitra ka hahatonga azy ho nofo eo amin’ny fiainantsika ka hamokatra zato heny.

Izay mitandrina ny Teny ka mitandrina azy ireny, hoy ny Tompo, dia toy ny trano miorina eo ambony vatolampy ka raha tonga ny oram-baratra ombàna rivo-doza dia tsy hihontsina ny trano fa hijoro lalandava. Ny Teninao tokoa ry Tompo no teny mahavelona. Jesoa ô, ny herin’ny Teninao anie hanova ny fiainanay !