Alarobia 26 mey 2021 — Herinandro fahavalo mandavantaona — Efa nataoko hoe sakaiza ianareo, hoy ny Tompo satria efa nambarako taminareo avokoa izay rehetra reko tamin’ny Ray — Evanjely Masina nosoratan'i Masindahy Marka 10, 32-45
Rentsika tamin’ny Evanjely teo ny fanambaran’i Jesoa ny fijaliany sy ny fahafatesany. Averimberiny matetika amin’ny mpianany izany mba tsy hanampoka azy ireo. Teny an-dalana ho any Jerosalema dia efa nambaran’i Jesoa an’ireo apôstôly roa ambin’ny folo lahy ny tsy maintsy hanjo azy. Gaga noho izany ny mpianany ary natahotra koa. Talohan’io tokoa manko, rehefa nilaza ny fahafoizany ny zavatra rehetra sy nanaraka an’i Jesoa i Piera, dia nampanantena azy ireo i Jesoa fa izay mahafoy ny zavatra rehetra noho ny fitiavana Azy, dia hahazo zato heny amin’ity fiainana ity ary ny fiainana mandrakizay koa amin’ny ho avy. Eto anefa dia tsy nafenin’i Jesoa ny mpianany ny marina fa hohesoina izy, hororàna, hokapohina ary hovonoina aza, fa aorian’izay kosa dia hitsangan-ko velona amin’ny andro fahatelo. Izany no lalana tsy maintsy ho lalovany, ary tsy maintsy handalovantsika mino Azy koa. Dia izany no nampiomanany ireo mpianany mialoha mba tsy ho tampoka amin’ny sedra ho tojo azy izy ireo.
Ny zavatra faharoa nambaran’ny Evanjely teo koa dia ny fangatahan’i Jakôba sy i Joany zanak’i Zebede : hipetraka eo an-kavian’i Jesoa ny iray ary eo an-kavanany ny iray. Anisan’ny mpianatra nanara-dia akaiky an’i Jesoa izy roalahy ireto. Ary nahazo tombony manokana mihitsy aza, raha tsy hiteny afa-tsy tamin’ny niovan’ny Tompo tarehy tany an-tendrombohitra, dia isan’ny nentin’i Jesoa niaraka taminy izy roalahy. Hita eto ny fanirian’olombelona, dia ny te hahazo toerana sy fahefana ary voninahitra. Hany ka notarihin’i Jesoa izy roalahy hibanjina ny hazofijaliana tsy maintsy hiaretana. Izany hoe hiatrika ny ankehitriny izay lalana hizorana mankany amin’ny ho avy. Ka ny toerana nomanin’Andriamanitra dia ny eo an-kavia sy an-kavanan’i Jesoa mifantsika eo ambony hazofijaliana. Tsy misy toerana manokana na fahefana, ho an’ny mpianatr’i Jesoa. Ny fitoriana ny Vaovao Mahafaly dia tsy hiandrandrana valisoa na karama manokana avy amin’Andriamanitra, fa fanomezana maimaim-poana avy Aminy ny fahasambarana mandrakizay ho an’izay matoky Azy.
Toe-po sy toe-panahy iainana ny maha kristianina, maha mpanara-dia an’i Kristy antsika ity nambarany ato amin’ny Evanjely ity hoe : ho tahaka Azy, tsy tonga mba hotompoina fa mba hanompo ny hafa ka tsy hikatsaka izay tombontsoa sy ny metimety amin’ny tenantsika fotsiny, fa miezaka indrindra koa hijery ny manodidina. Ohatra ho antsika i Masindahy Philippe Néri izay tsaroan’ny Fiangonana anio : nisokatra tamin’ny olon-drehetra, hampiroborobo ireo hatsaram-panahin’ny fitiavam-bavaka, fitiava-namana ary fahazotoana amin’ny asa iandraiketana.
