Sabotsy 6 febroary 2021 — Herinandro fahefatra mandavantaona — Ny ondriko mihaino ny feoko, hoy ny Tompo. Izaho mahalala azy, ary izy manaraka ahy — Evanjely Masina nosoratan'i Masindahy Marka 6, 30-34

Ry kristianina havana, nanao tatitry ny diany ny Apôstôly. Teo amin'i Jesoa izy ireo no niala, nandeha tamin'izay nanirahana azy, ary miverina eo amin'i Jesoa indray. Manao tatitra, mametraka aminy asa vita, ary manovo hery vao indray. Fa eo koa, ankilan'izany ny hoe mihalalina ny finoana, rehefa dinihina miaraka mandritra ireny fihaonana isan-karazany ireny. Tsy hoe finoako ity, dia aleo ho ahy sy Andriamanitra irery, fa mampandroso ny miara-midinika. Na dia ny fahazotoana mamonjy ny fihaonana alahady fotsiny aza, miampy ny fihaonana amin'ny sehatra hafa toy ny amin'ny fikambanana masina dia efa mampitombo ny finoana ireny.

Nasain'i Jesoa nitokana ny mpianany mba haka aina. Io no tsy ampy ny olona ankehitriny, fa manenjika ny rotorotom-piainana : mihazakazaka etsy, manenjika raharaha eroa. Vokany : vizana. Tonga ny karazan'aretina vokatry ny rarin-tsaina isan'andro. Marary sy farofy, kizitina sy mora tezitra ary masiaka. Na ny fotoana hivavahana aza toa tsy misy. Toroana hevitra isika rehetra, mba hamela fotoana fohy isan'andro, hanginana, handinihana ary hivavahana. Soa ho an'ny vatana ny miala sasatra, ary soa ho an'ny fanahy ny mivavaka.

Nangoraka ireto vahoaka nanaraka Azy i Jesoa, vahoaka noana sy mangetaheta, tahaka ny ondry tsy misy mpiandry. Io fo mangoraka io, ilay fon'Andriamanitra tohina, mahita ny fahorian-janany. Ho fo miara-mitempo amin'i Jesoa Mpiandry ondry tsara anie isika. Tsy ho fo vato fa ho fo nofo, manam-pitiavana. Hanangona izay miahaka, hamahana izay noana sy mangetaheta, hitsabo ny marary, ary hitantana azy ho any amin'ilay tanim-bilona mandrakizay. Amen.