Alakamisy 21 janoary 2021 — Herinandro faharoa mandavantaona — Araikao amin’ny fanambarànao ny foko ry Tompo, ary ny lalanao no aoka hanenika ahy — Evanjely Masina nosoratan'i Masindahy Marka 3, 7-12
Dia izay ambaran'i Masindahy Marka izay no mampiseho amintsika fa iraka tokoa i Kristy, misiônera, natao ho an'ny olon-drehetra. Tsy hoe ireo Jody tao Palestina ihany no nanaraka azy, fa ny olon-drehetra, eny fa na ireo nanohitra Azy aza. Anisan'izany ny fanahy maloto, izay niankohoka sy niaiky teo anatrehany, ka nilaza hoe : "Ianao no Zanak'Andriamanitra". Nirahina hamonjy ny olona Izy, hanohitra ny ratsy, hany ka izay rehetra nanana aretina, dia nifanesika hositraniny. Marina fa gaga ny olona nahita ny nataony, kanefa izay mihitsy no tarigetran'Andriamanitra, nanirahany ny Zanany. I Jesoa dia Mpamonjy, nahay nanetry tena, tsy mila indraindraina na hoe mila dera, izany no nahatonga Azy handrara sy handrahona ireto fanahy maloto, mba tsy hanao izay ahafantarana azy. Toetra takiana mba hananan'ny mpanao ny asan'i Kristy izany ankehitriny. Hanao am-po mandrakariva ny asa anirahana azy, tsy hisatry fanahy ary tsy ho tia sehoseho na voninahitra, fa miaina sy mampihatra mandrakariva ny fanetren-tena. Tsy tia sehoseho na hoe laza, fa miasa amim-panginana amin'ny fanohizana ny asam-pamojena anirahana azy.
