Talata 19 janoary 2021 — Herinandro faharoa mandavantaona — Raiso ny tenin’Andriamanitra; tsy ho toy ny tenin’olombelona anefa fa araka ny marina tokoa, ho tenin’Andriamanitra — Evanjely Masina nosoratan'i Masindahy Marka 2, 23-28

Dia mbola mitohy ihany eto ny fifanoheran'i Kristy sy ny Farisianina. Ambaran'i Masindahy Marka ny mikasika ny fanajana ny sabata, somary mivelatra ny fomba fisainan'i Kristy fa tsy mikombona tahaka ny an'ny Farisianina. Ny maha olona ny azy no omeny lanja kokoa noho ny lalana, satria hoy Izy : "Ny sabata no natao ho an'ny olona, fa tsy ny olona no ho an'ny sabata". Izany hoe, tsy natao ho andevozin'ny lalana ny olona, fa ny olona no mandika sy mandinika ary mandanjalanja izay tokony ho fampiharana izany lalana izany. Ary mbola nohamafisiny sy nampiany indray aza hoe : "Ny Zanak'Olona dia tompon'ny sabata". Toy ny fananana izany, ho an'i Kristy ny sabata, ka tsy natao hangeja fa tokony hitondra fahafahana aza. Ny fananana dia misy ny fotoana hilana azy sy hampiasana azy, ary misy koa ny fotoana hametrahana azy fa tsy horaharahina. Koa izay fahaiza-mandanjalanja ny zava-misy izay, mba hitsinjovana ny maha olona, no hafatra apetrak'i Kristy, ampitainy manoloana ny tsiketra ataon'ny Farisianina. Nandraisany ohatra tamin'ny nataon'i Davida, raha terin'ny hanohanana izy sy izay nanaka azy, niditra tao an-tranon'Andriamanitra. Isika koa dia ampianarin'i Kristy eto, ny amin'ny fanatanteraha izany lalana na fitsipika eny anivon'ny fiaraha-monina izany, mba hahay handanjalanja, hanadihady, fa tsy ho tery saina ka hifototra amin'ny hoe azo atao, na tsy azo atao fotsiny, fa mba hijery ny maha olona sy izay mahavelona azy ireo.