Alarobia 09 desambra 2020 — Herinandro faharoa amin'ny Fiaviana — Evanjely Masina nosoratan'i Masindahy Matio 11, 28-30 — Indro ho avy ny Tompo hanavotra ny vahoakany, sambatra izay vonona ny hitsena Azy.
Raha jerena maimaika dia sahala amin’ny hoe miteny zavatra roa mifanohitra i Jesoa. Makanesa aty amiko ianareo rehetra izay mijaly sy vesaram-pahoriana, fa hanamaivana anareo aho. Avy eo anefa dia miteny indray izy hoe ento ny jiogako. Fomba fijery maika moa izany fa ny voalohany dia manentana antsika tsy hiady irery amin’ny fiatrehana ny zava-manahirana, ny adin-tsaina, ny aretina, ny fahafatesana. Tsy hoe foana tsy misy akory izany, fa maivana, izany hoe azo atrehina sy zakaina ihany rehefa entina miaraka amin’Izy Tompo. Raha lazaina amin’ny teny hafa dia hoe rehefa tsy manatona an’i Jesoa isika dia hahatsapa tanteraka ny vesatr’ireo rehetra ireo. Ny hatahorana amin’izany dia ny famoizam-po ary mety hanaotao foana mihitsy aza.
Faharoa, fomba fitenintsika ny hoe fitia mifamaly mahatsara fihavanana, ny entan-jaray mora zaka. Koa raha nifanampy tamintsika Jesoa Tompo tamin’ny androm-pahoriana, tamin’ny fijaliana dia didiany kosa isika hifanampy Aminy, hizara fitiavana. “ento ny jiogako, mianara amiko fa malemy fanahy sy manetry tena ao am-po aho”. Jiogam-pitiavana no tiana hambara amin’izany. Azontsika ananana àry, izany toe-panahy izany raha malemy fanahy sy manetry tena ao am-po isika. Koa, aza atao vavaka eo imolotra fotsiny, fa raiso ho anao ao am-po mihitsy ilay hoe : “Ry Jesoa, malemy fanahy sy manetry tena ao am-po, ataovy manahaka ny fonao ny fonay”. Koa maninona ihany koa moa raha atao hoe : ry Jesoa malemy fanahy sy manetry tena ao am-po, ataovy manahaka ny fonao ny foko, ny fon’ny dadanay, ny fon’ny mamanay, ny mpitondra anay…
Farany, mbola manamafy io efa voalaza io ihany dia hoe : tsy lalam-piainan’i Jesoa irery ihany anie ny fitondrana ny hazofijaliana, fa ho an’izay misafidy hanaraka Azy ihany koa. Koa, raha sendra ny mafy sy ny mangidy ianao eo amin’ny fiainana, mahatsiaro tena fa mizaka fijaliana tokoa, dia ekeo izany ho famonjena ny fanahinao sy ho famonjena ny fanahin’ny hafa, satria : “izay te hamonjy ny ainy no hahavery azy, ary izay hahafoy azy noho ny amiko, hoy i Kristy, no hahazo azy”.
