Sabotsy 31 ôktôbra 2020 — Herinandro faha-30 mandavantaona — Evanjely Masina nosoratan'i Masindahy Lioka 14, 1. 7-11 — Ny Teninao, ry Tompo, dia fanahy sy fiainana ; Ianao no manana ny teny mahavelona mandrakizay.
Ampahatsiahivin’i Masindahy Paoly Apôstôly antsika ny maha zava-dehibe ny fitoriana an’i Jesoa Kristy na aiza na aiza toerana misy antsika. Mahatsapa hafaliana ery izy mahita ny fahamatoran’ireto kristianina any Filipo amin’ny finoana. Ho azy, i Jesoa Kristy irery ihany sy ny fiombonana aina Aminy no zava-dehibe eto an-tany.
Hamafisin’i Jesoa Kristy ao amin’ny Evanjely ihany koa izany. Gaga Izy fa toa mihazakazaka ny hahazo ny toerana voalohany sy toerana tsara ny ankabeazan’ny olona tonga amin’ny fanasana. Tsy mifanaraka amin’ny fanasan’ilay Zanak’ondry anefa izany fihetsika izany, fa ny fiombonana aina amin’i Kristy sy ny fibanjinana Azy no voalohan-daharana fa izany no toerana sahaza sy tsy manam-paharoa azon’izay manatanteraka izany.
