Sabotsy 18 jolay 2020 — Herinandro faha-15 mandavantaona — Evanjely Masina nosoratan'i Masindahy Matio 12, 14-21 — Aza mba hamafisina ny fonareo anio, fa henoy ny feon'ny Tompo.

Tsapantsika avy amin'ity Vaovao Mahafaly ity fa difotra ao anaty fanarahana ambokony ny lalana fotsiny ireto Farisianina ireto ka tsy mahalala izay soatoavina maha olona ny olona. Ny hiampanga an'i Kristy no mahamaika azy ireo. I Kristy no mampahatsiahy azy ireo fa ny olona no ambony noho ny biby ka mety ny manasitrana ity lehilahy maty tanana an'ila ity, ary azo atao tsara ny manao soa na dia sabata aza ny andro. Tsy nahasakana ny fanatanterahan'i Kristy ny asa fanasitranana natrehany ny fiokoan'ireto tsy maty voalavo an-kibo, saingy tamim-pahanginana no nanatontosany izany, izay ilay fianakaviam-ben'ny lalam-pahanginan'ny mpamonjy : "Loi du Silence messianique".

Angatahan'i Kristy mba hanao izay tsy ahafantarana Azy ireo nositraniny ary hitazona ny zava-miafin'ny maha Izy Azy, dia izay ilay "fanetren-tenan'ny mpanompo". I Kristy tokoa ilay Mpanompon'Andriamanitra nanao izay tratry ny ainy amin'ny fanasoavana sy famonjena ny olombelona, tsy mba mieboebo Izy na mila tambiny. Aiza ho aiza amin'izany isika izay mitondra ny anarany hoe "kristianina", nateraka tamin'ny batemy mba ho mpanompo toa Azy. Enga anie isika tsy hisatry fanahy hanatanteraka ny manandrify antsika, ary tsy hatahotra izay mety ho fanenjehana manoloana ny antso miantefa amintsika.