Zoma 26 jona 2020 — Herinandro faha-12 mandavantaona — Evanjely Masina nosoratan'i Masindahy Matio 8, 1-4 — Manantena ny Tompo ny fanahiko, miandry ny teniny aho.
Toy ny efa nambara antsika omaly, ny fampianarana sy ny asa dia zavatra roa tsy misaraka ho an’i Kristy. Iraka nosahaniny nankinin’Ray Azy mantsy ny fampianarana sy ny fizarana amintsika olombelona ny fomba maha Andriamanitra an’Andriamanitra sy ny famonjena.
Avy nampianatra tany an-tendrombohitra i Jesoa no nanasitrana ity boka anankiray nanatona sy nitsaoka ary nangataka taminy mba ho sitraniny. Fahagagana voalohany nataon’i Jesoa io, araka an'i Masindahy Matio, maneho amintsika fa ao Aminy no miharihary sy tanteraka ny fitiavan’Andriamanitra an’izao tontolo izao ary amin’ny Alalany no hazoana ny atao hoe : famonjena. Very sy lavitra an’Andriamanitra mantsy isika olombelona noho ny haratsiana sy ny fahotana, rava fihavanana sy fifandraisana ihany koa amin’ireo manodidina antsika, izany no endriky ny habokana manjo antsika ankehitriny, ka nanirahan’ny Ray ny Zanany mba hamerina antsika indray ao Aminy sy hijoroantsika sy hiainantsika ny maha zanak’Andriamanitra antsika.
Tsy tamin’ny filana dera anefa no nanatanterahan’i Kristy ny fahefana nomena Azy, antony nilazany tamin’ilay sitrana hoe : “aza miteny na amin’iza na amin’iza”, fa tamim-panetren-tena lehibe, mba ho fianarana ho antsika ihany koa rahefa manao soa isika. Fa ny fomban’Andriamanitra ao aminy no zarainy amintsika mba hiainantsika izany amin’ny andavanandrom-piainana.
Matokia manatona Azy isika fa Izy irery ihany no afaka hamerina antsika indray ao amin’Andriamanitra sy hanavao ny fiainantsika manontolo, ary meteza haka tahaka Azy koa mba mba hiseho ny maha zanak’Andriamanitra antsika.
