Alarobia 24 jona 2020 — Ny nahaterahan'i Joany Batista — Evanjely Masina nosoratan'i Masindahy Lioka 1, 57-66. 80 — Ianao, anaka, hantsoina hoe mpaminanin'ny Avo indrindra : handeha eo anoloan'ny Tompo hanamboatra ny lalany.

{mp3}20200624-evanjely{mp3}

Tsy hoe ny fahatongavan’i Joany Batista teto an-tany akory no tiana hisongadina, amin’izao fankalazana ny nahaterahany izao, araka ny Evanjely nambara tamintsika teo, fa ny fifidianan’Andriamanitra azy manokana teo amin’ny tantaram-pamonjena, hahalalan’ny maro an’ilay Mpamonjy nirahiny teto amin’izao tontolo izao.

Hafa indrindra amin’izay natera-behivavy i Joany, satria ny fanambarana ny nahaterahany dia toa mistery eo imasontsika olombelona, ireo Ray aman-dReny niteraka azy efa zoky olona fa noho ny finoana sy ny fitokisan’izy ireo an’Andriamanitra dia tera-dahy. Maneho amintsika fa asan’Andriamanitra no nahazoana an’i Joany Batista, fampanantenany tamin’ireo natoky Azy ary tsy nivadika Taminy na ovina na ovina. Andriamanitra irery ihany no mahatanteraka izay nampanantenainy, koa tokony hatoky an’izany isika.

Faharoa, manokana momba an’i Joany ny fanomezana anarana araka ny tenin’ny Anjely tamin’i Zakaria, dia maneho fa Andriamanitra no momba sy mifidy ary maniraka azy hisava ny lalana handehanan’ilay Mpamonjy an’izao tontolo izao ; ka nahatonga azy nanoman-tena sy tsy nisatry fanahy nanantanteraka izany.

Toetra tahafintsika amin’i Joany àry ny hanararaotra ny fotoana sy ny toerana hihaonana amin’Andriamanitra ka hifandray lalina Aminy mba hahalalantsika ny sitrapony ka hanantanterahantsika izany. Enga anie ny fahalalantsika ny zava-dehibe nataon’Andriamanitra tamin’i Joany Batista hampitombo ny finoana sy ny fanantenantsika ka tsy hanadinoantsika an’Andriamanitra na ovina na oviana.