Alatsinainy 27 aprily 2020 — Herinandro fahatelo amin'ny Paka — Evanjely Masina nosoratan'i Masindahy Joany 6, 22-29 — Nahita Ahy ianao ka mino, fa sambatra izay tsy nahita ka mino.

Nitady an’i Jesoa ny vahoaka ny ampitson’ny fampitomboana ny mofo. Ny antony hitadiavany Azy dia satria nihinana ny mofo izy ireo ka voky fa tsy nohon’ny fahagagana izay nataony loatra.

Avahan’i Jesoa àry eto ny hanina izay mety ho levona sy ny hanina maharitra mandrakizay. Isika olombelona tokoa mantsy matetika dia revo amin’ny asa izay hahazoantsika ny sakafo mety ho levona. Ataontsika ambony noho ny fiombonam-bavaka ny asa aman-draharaha. I Jesoa anefa tsy manameloka mihitsy ny hiasantsika ho an’ny nofo fa tiany koa isika hiasa mba hahazo ilay sakafo maharitra ho an’ny fiainana mandrakizay. Inona ary izay asa izay ? Ny asa dia ny mba hinoantsika an’Andriamanitra Ray, izay manome ny fiainana mandrakizay sy ny mba hinoantsika an’Ilay nirahiny dia i Jesoa Zanany.

Ny finoana an’i Jesoa àry no hahafahantsika manatanteraka ny sitrapon’Ilay Andriamanitra Ray. Ny finoana Azy dia tsy hoe mahafantatra fotsiny hoe misy Izy na hoe Zanak’Andriamanitra Izy fa mila miombom-po sy miombom-piainana miaraka aminy mba hahafahantsika manatanteraka izay nolazainy.

Koa mangataha amin’Izy Tompo àry isika mba hovelominy amin’ilay mofon'ny fiainana izay maharitra mandrakizay. Hoy mantsy Izy hoe : "Izay manatona Ahy tsy mba ho noana intsony, ary izay mino Ahy tsy hangetaheta mandrakizay".