13 desambra 2024 — Zoma, Herinandro faharoa amin'ny Fiavian'ny Tompo — Avia, ry Tompo, vangio am-piadanana izahay, mba hifalianay amin’ny fo lavorary — Evanjely Masina nosoratan’i Masindahy Matio (Mt 11, 16-19)

Mila manao dingam-pahamatorana eo amin’ny sehatry ny finoana isika. Finoana mila mitombo, mila miha-lalina hatrany hatrany. Mazàna no tsy mitombo ny finoantsika, toa mihena koa tsindraindray. Tsy masaka sy tsy matotra ny finoantsika rehefa tsy mampifanaraka ny fiainantsika amin’ireo fepetra takian’ny Vaovao Mahafaly: mbetika ny Vaovao Mahafaly manasa antsika hifaly fa tsy mifaly isika; mbetika manasa antsika hangoraka sy halahelo ireo voan’ny tsindry hazo lena, kanefa indrisy toa tsy mampihetsika ny volomasontsika na koa tsy manohina ny fontsika velively ny hafatra entiny.

Tsy ahitana fahamatorana aoka izany ny finoantsika satria mila tany malemy hanorenam-pangady isika, na manao ilay tsobo-dranon-dRamiangaly koa raha marivo irobohana fa raha lalina kosa ihemorana. Tsarovy anefa fa manamafy ny finoana ny firosoana bebe kokoa, ary vao mainka manamafy azy bebe kokoa ireo karazam-pitsapana isan-karazany omban’ny fahasoavan’Andriamanitra.