11 desambra 2024 — Alarobia, Herinandro faharoa amin'ny Fiavian'ny Tompo — Indro ho avy ny Tompo hanavotra ny vahoakany, sambatra izay vonona ny hitsena Azy — Evanjely Masina nosoratan’i Masindahy Matio (Mt 11, 28-30)
Maro samihafa no heverintsika hanamaivana ny fijaliana sy ny fahoriana mitambesatra amintsika: zava-mahadomelina matetika, fandehanana mirenireny tsy misy anton-dia velively, fitantarana atsy sy aroa ny zavatra mahazo. Matetika hadinontsika ny manatona an’i Jesoa Kristy ao amin’ny tabernakla na koa mitantara an’ireo aminy.
Fa manasa antsika hanana fomba fijery vaovao ilay didim-pitiavany ihany koa ny Tenin’Andriamanitra anio. Manamaivana ny fahoriana sy ny fijaliana ny fiainana azy io satria vokatry ny fitiavana fa tsy an-kiteritery akory ary manafaka amin’ireo karazam-pamatorana misy, toy ny fitiavan-tena, ny fanaovana ny hafa ho tsinontsinona.
