24 septambra 2024 — Talata, Herinandro Tsotra fahadimy amby roapolo Mandavantaona — Raha misy tia Ahy, dia hitandrina ny teniko izy; ka ho tian’ny Raiko ary hankao aminy izahay, ka honina ao aminy — Evanjely Masina nosoratan’i Masindahy Lioka (Lk. 8, 19-21)
Mila manao dingana isika kristianina amin’ny fanarahan-dia an’i Jesoa Kristy. Tsy ampy velively ny faharahan-dia Azy araka ny seha-piainana misy antsika sy ny safidim-piainana ahafantarana antsika fa mila tonga hatrany amin’ny fiombonana aina amin’i Kristy isika; mila mifandray aminy toy ny mpiray tampo aminy: rahalahy na koa anabavy ary ho ray aman-dreny.
Amin’alalan’ny fikolokoloana ny fahaiza-mihaino ny Teniny no fepetra voalohany ahatongavana amin’izany. Miteny amintsika isan’andro Izy ao amin’ny Evanjely, koa asaina isika hihaino Azy fa izany no endrika anehoantsika ny toe-tsaina maha zanak’Andriamanitra, ka hitiavan’ny Ray antsika ao amin’i Jesoa Kristy.
Mila iainana ihany koa anefa izany Tenin’Andriamanitra izany. Io no fepetra faharoa takian’i Jesoa amintsika. Tonga lafatra ny maha fianakavian’i i Jesoa Kristy antsika satria miteraka fiombonana sy fifampitokisana ny fihainoana sy fiainana ny Teniny.
