19 jona 2024 — Alarobia, Herinandro Tsotra faharaika ambin'ny folo Mandavantaona — Ampianaro ahy, ry Tompo, ny soritrao, ary tariho ho amin’ny fahamarinanao aho — Evanjely Masina nosoratan’i Masindahy Matio (Mt. 6, 1-6. 16-18)

Ry kristianina havana; fomba nolovana tamin’ny Jody ny fanaovan-tsoa sy ny fifadian-kanina, sy ny fomba maro hafa koa fitaizam-panahy. Saingy ny toe-panahy enti-manatanteraka azy no mampiavaka azy. Saika mifanohitra mihitsy izany. Tsy mitsara sy mandiso sy manameloka isika fa mahasangenehana mihitsy ny mahita ny sasany raha vao mba manampy olona dia alaina sary sy aparitaka, avoaka amin’ny fampielezam-peo sy fahitalavitra, alefa mivantana ho hitan’ny be sy ny maro amin’ny tambajotran-tserasera. Toa filan-dera sy fisehosehoana no betsaka, toa fividianana konsiansin’olona hifidy ny tena sy filan-tombon-tsoa manokana no ao ambadika; feno fihatsaram-belatsihy. Tsy hevitr’i Jesoa izany. Manao soa mangina tsy misy mahita afa-tsy Andriamanitra irery ihany.

Toy izany koa ny fifadian-kanina: fanetren-tena sy fifehezan-tena no tanjona fa tsy fisehosehoana; tsy ilaina atao fantatr’olona akory hoe mifady hanina. Tsy amin’ny karemy ihany no mila mifady hanina fa rehefa misy fiomanam-panahy atao (manomana fety lehibe na misy fangatahana fahasoavana manokana) na koa asa fanonerana sy fibebahana lalina. Aoka Andriamanitra irery no hahita; aoka ho voninahitr’Andriamanitra. Amen.