23 febroary 2024 — Zoma, Herinandro Voalohany amin'ny Karemy — Tsy ny hahafatesan’ny ratsy fanahy no sitrako fa ny hialan’ny ratsy fanahy amin’ny lalany ka ho velona izy — Evanjely Masina nosoratan’i Masindahy Matio (Mt. 5, 20-26)
Ezaka andrasana amintsika amin’izao karemy izao, ity voalazan’ny Evenjely teo ity, dia ny fitodiantsika amin’ny hafa, amin’ireo namana fa indrindra ireo mpiara-belona amintsika. Fibebahana tokony asehontsika voalohany izany fa tsy misaraka velively kosa amin’ny fifandraisantsika amin’Andriamanitra. Ny fampianaran’i Kristy anio dia manampy antsika indrindra amin’izany, ary manitsy antsika koa mba tsy ho endrika ivelany ny fomba entintsika manatanteraka izany, fa ho tena fitiavana marina, izany hoe: tena fitiavana an’Andriamanitra sy ny namana, izay tsy misaraka ary tsy mifanohitra velively.
Andriamanitra raha nitia dia ny maha Izy Azy no nanehony izany, ny maha Fitiavana Azy no nataony tamintsika olombelona. Koa raha mitia koa isika dia tokony ny tenantsika, ny maha isika antsika manontolo tsy voazarazara, no entintsika mitia, ary toy izany koa no iantefan’ny fitiavana ataontsika, tsy endrika ivelany toy ny an’ny Farisianina, fa fiainana anaty. Eo anatrehan’izany indrindra no hiezahana hifehy izay rehetra mety hamono ny hafa, hoy i Kristy, na teny na fihetsika na asa atao mivantana, fa endrika mamono ireo namantsika avokoa izany rahefa tsy voalanjalanja.
Eo koa ny fiezahana hanana toe-po mihavana, toe-po madio. Tsarovy fa ny fahalavorariantsika manoloana an’Andriamanitra dia tsy misaraka velively amin’ny fahalavorarian’ny fitiavantsika ny namana, fahalavorarian’ny fahamarinana sy ny rariny ataontsika amin’izy ireo. Ary tsy manana ny hasiny sy tsy ahitantsika sitraka eo anatrehan’Andriamanitra ny tolotra sy fanatitra ataontsika raha toa ka ny fontsika feno fankahalana, feno lolom-po, ra toa ka ny fontsika tsy afaka hisokatra sy vonona hifandray amin’ny namantsika.
Koa amin’izao karemy, fotoana tsara ibebahana izao, diovy sy havaozy ny fontsika, mba ho fo nofo afaka hitia marina tokoa.
