31 ôktôbra 2023 — Talata, Herinandro Tsotra fahatelopolo Mandavantaona — Raiso amim-pahalemem-panahy ny teny voafafy aminareo, izay mahavonjy ny fanahinareo — Evanjely Masina nosoratan’i Masindahy Lioka (Lk. 13, 18-21)

Ny fanjakan’Andriamanitra no tanjon’i Jesoa sy nimatimatesany. Saro-takarina izy izany ka fanoharana no entiny mampianatra azy. Anisan’ny fomba iray hampitana fampianarana ny fanoharana ka izay mihaino no mandinika any am-pony sy manaiky tsy terena fa araka ny fieritreretany.

Tahaka ny voatsinampy sy ny lalivay ny fanjakan’Andriamanitra. Kely eo am-panombohana fa mandaitra tsara satria manana ny heriny ao aminy. Tahaka izany i Jesoa sy ireo Apôstôly tany am-boalohany; vitsy sy kely fa nanana ny heriny ka mahenika izao tontolo izao ankehitriny ary mahavonjy mandrakizay.

Izany koa no tsy maintsy fiainantsika ara-pinoana: tsy miferinaina hoe “ka izahay vitsy, ka izahay kely…”. Tsy ny hamaroana na ny habe no inona fa ny heriny ao anatiny sy ny fahatokiany, tsy mivatravatra anefa fa mandaitra avy ao anatiny, mahaova ny aty fon’ny olona, mahataona ny olona rehetra sy manitatra ny fanjakan’Andriamanitra ho an’ny taranaka mifandimby. Amen.