Sabotsy 31 desambra 2022 — Andro fahafito amin'ny Havaloan'ny Noely — Ny Teny dia tonga nofo ka nonina taty amintsika. Izay rehetra nandray Azy dia nomeny fahasoavana ho tonga zanak’Andriamanitra — Evanjely Masina nosoratan'i Masindahy Joany 1, 1-18
Ry havana, mamarana ny havaloan’andro fankalazana ny Noely isika anio. Ary mamarana ny taona 2022 ihany koa. Rentsika tamin’ny Evanjely teo fa Ilay Teny, Tenin’Andriamanitra, dia efa nisy talohan’ny nahatongavany ho nofo. Hoy indrindra ny fiekem-pinoantsika :
“teraky ny Ray talohan’ny taona rehetra,
Andriamanitra avy amin’Andriamanitra”.
Io Tenin’Andriamanitra tonga nofo io no manambara an’Andriamanitra amintsika. Io Tenin’Andriamanitra io no mampahafantatra antsika an’Ilay Andriamanitra Ray, satria sady tao amin’Andriamanitra Izy no tena Andriamanitra ihany koa. Talohan’ny nahaterahany tety an-tany, talohan’ny nisehoany tao an-tranon’omby tany Betilehema, dia efa nisy tao amin’ny fiombonan’ny Trinite Masina ny Teny. Araka izany, rehefa mijery an’i Jesoa teraka tety an-tany, dia tsy tokony ho hadinontsika fa Andriamanitra no miseho amintsika.
Hatrany amin’ny Testamenta Taloha, tamin’ny andron’i Moizy, dia efa niseho tamin’ny endrika maro tamin’ny vahoakany Andriamanitra. Nasesiky ny fitiavana Izy ka tsy nitsahatra naneho izany fitiavana izany tamin’ny vahoakany. Loharanom-pahasoavana sy fahamarinana Andriamanitra ka izany indrindra no namehoany ny fifandraisany tamin’ny vahoaka Israely. Ary rehefa tonga tety an-tany i Jesoa, dia nasehony miharihary tamin’ny olona io fahafenoan’ny fahasoavana sy fahamarinan’Andriamanitra io. Ny fankalazana ny Noely no nitsimohan’ny fahasoavana sy fahamarinana nentin’i Jesoa ho an’ny olon-drehetra. Koa izay mino an’i Jesoa dia tafiditra ao amin’ny hafenoana vaovao, satria sady mahalala an’Andriamanitra no tonga zanak’Andriamanitra rahateo. Hany ka mahalala ny zavatra rehetra, araka ny ambaran’i Masindahy Joany amin’ny vakiteny voalohany androany.
Aza mandraraka ilo mby an-doha. Tandrovy mandrakariva ny maha zanak’Andriamanitra anao fa efa voahosotr’ilay Masina ianao. Arovy ny finoana satria, avy ary efa misy antikristy maro ankehitriny, hoy hatrany i Masindahy Joany. Ny jery todiky ny taona hivalona androany no hanampy antsika hanamafy hatrany ny finoantsika mba ho afaka manao dingana vaovao ihany eo am-pamakivakiana ny taona vaovao. Samia ho tahin’Andriamanitra.
