Alahady 20 nôvambra 2022 — I Kristy Mpanjakan'izao tontolo izao — Hosoavina anie Ilay avy, amin’ny Anaran’ny Tompo; hosoavina anie ny fanjakan’i Davida Raintsika — Evanjely Masina nosoratan'i Masindahy Lioka 23, 35-43

Mamarana ny Alahady amin’ny taona litorjika ny Eglizy anio izay hankalazana indrindra an'i Jesoa Kristy Mpanjakan’izao tontolo izao. Ny Evanjely anefa dia mitantara ny namantsihana Azy teo ambonin’ny Hazofijaliana. Eto isika dia mahita an'i Jesoa izay nofantsihana teo amin’ny Hazofijaliana, eo anelanelan’ny jiolahy roa. Inona àry no maha mpanjaka an'i Kristy amin’izany ? Ary amin’ny fomba ahoana no hanavotany antsika ?

Voalazan’ny Evanjely àry fa teo amin’io Hazofijaliana io no nanavotany ny iray tamin’ireo jiolahy, tsy voaavotra tamin’ny fahafatesana teto an-tany fa avotra kosa tamin’ny fahafatesana mandrakizay, satria voavonjy ny andron’iny ihany, rehefa nampanantenainy ny paradisa. Midika izany fa tsy eto amin’izao tontolo izao ny fanjakany fa fanjakana afaka hidirana amin’ny alalan’ny fibebahana. Fanjakana izay teraka tamin’ny alalan’ny Rà sy rano izay nalatsany teo ambonin’ny Hazofijaliana. Fanjakana izay handovantsika ny fiainana mandrakizay. Izy tokoa no Mpanjakan’ny Fitiavana sy ny Fiadanana. Tsy ilay jiolahy nivalo ihany araka izany no novonjeny teo ambonin’ny Hazofijaliana, fa ny olombelona rehetra mihitsy. I Kristy àry no Mpanjaka, izay nahafoy ny ainy ho fanavotana antsika. Tsy tonga ny mba ho hotompoina tokoa fa hanompo.

Manentana antsika àry i Jesoa mba hanaraka ny Lalany : tsy ho any amin’ny voninahitra fa ho any amin’ny fanetren-tena sy fanompoana. Ireo tokoa mantsy no lalana hidirantsika any amin’ny Fanjakany.

Tompo ô, Mpanjaka tsy manam-petra Ianao sy Mpanjaka tokana hany Mpamonjy an’izao tontolo izao . Ho anao irery anie ny voninahitra amin’ny taona rehetra mandrakizay.