Alarobia 2 nôvambra 2022 — Fahatsiarovana ireo nody mandry — Avia, ianareo, ry nohosoavin'ny Raiko, handova ny fanjakana izay voavoatra ho anareo hatrizay nahariana izao tontolo izao — Evanjely Masina nosoratan'i Masindahy Joany 6, 37-40
Mahatsiaro ireo mpino nodimandry isika anio. Ny Evanjelin’i Masindahy Joany, mahakasika ilay toriteny nataon’i Jesoa tao Kafarnaoma no sakafom-panahintsika. Ny hahavoavonjy antsika olombelona tsy an-kanavaka no nidinan’i Jesoa Kristy Zanak’Andriamanitra teto an-tany. Ny fitsanganan-kovelona ho amin’ny fiainana mandrakaizay no famonjena andrandraina eto. Tsy mandeha ho azy anefa izany famonjena antsika izany fa mitaky ny finoantsika an’i Jesoa Kristy, irak’Andriamanitra. Tsara homarihina fa tsy vokatry ny asa sy ny ezaka ataontsika akory ny hahafahantsika manatona an’i Kristy fa ny fahasoavan’Andriamanitra mandrakariva, izay mila italohoana aminy am-pitokiana tsy an-kijanona.
Tsaroantsika manokana etoana àry, ireo havana, tapaka sy namana efa nialoha làlana antsika ao an-tranon’ny Ray, mba ho afaka hiara-higoka hatrany ny famindram-pon’Andriamanitra.
