Alakamisy 22 septambra 2022 — Herinandro Tsotra fahadimy amby roapolo Mandavantaona — I Jesoa Kristy Mpamonjy antsika no nanafoana ny fahafatesana sy nanambara ny fiainana amin’ny Evanjely — Evanjely Masina nosoratan'i Masindahy Lioka 9, 7-9

"Aleo enjehin'ny omby masiaka, toa izay enjehin'ny eritreritra", tsy mandry ny feon'ny fieritreretan'i Herôda, noho ny zava-bitany vokatry ny saina tsy mandinika kely akory, fa nanaiky ny filana ara-nofo be fotsiny. Misy feo manitikitika azy avy any anatiny noho ny fahotana vitany. Izany tokoa no tonga amin'ny fitenenana hoe "Aza manao ratsy ihany", fa tsy avelany handry andro aman'alina ianao. Nandre ny lazan'i Jesoa i Herôda ka tsy nandry ny sainy, ny olona manodidina azy koa nanampy trotraka samy nilaza izay fahafantarany azy. Ny marina tokoa tsy mba maty, ka na dia notapahan-doha aza i Joany dia indro i Jesoa, ilay Marina, nanitikitika ny feon'ny fieritreretan'i Herôda. Anisan'ny fomba itenenan'Andriamanitra amintsika mantsy io feon'ny fieritreretana io, ka mila fanadihadiana sy fandanjalanjana lalina amin'izay atao mba tsy ho henjehiny eny amin'ny andavan'androm-piainantsika eny isika, tahaka an'i Herôda, satria "ny soa atao tokoa, levenam-bola fa ny ratsy atao loza mihantona', koa samia mitandrina àry.