Sabotsy 3 septambra 2022 — Herinandro faharoa amby roapolo mandavantaona — Asehoy ahy, ry Tompo ny lalanao, ary tariho amin’ny lala-mahitsy aho — Evanjely Masina nosoratan'i Masindahy Lioka 6, 1-5
Zava-dehibe mamaritra ny finoana Jody ny lalana, izay mamaritra ny fomba tokony hitandrovana ny sabata, andro voatokana ho an’Andriamanitra ka tsy azo anaovana na inona na inona. Tamin’ny Evanjely henontsika teo anefa, dia ny mpianatr'i Jesoa mihitsy no manao zavatra mandika izay raran’ny lalana momba ny sabata. Tsy hoe baiko avy amin'i Jesoa akory fa toe-javatra itondran'i Jesoa fampianarana, mba hatsapan'ireto Farisiana ny kendren’Andriamanitra momba ny lalana napetrany ary indrindra indrindra ny hahalalan'izy ireo hoe "iza marina ity Jesoa ity ?"
Fihetsika ihany no nataon’ny mpianatr'i Jesoa, fa ny zava-dehibe raketiny dia ny hoe : "raha noana ny vatana", mila tohanana, ary ny aina no ambon’ny zavatra rehetra. Ny ahavelona antsika no tanjon’ny lalana omen’Andriamanitra antsika olombelona, hahaizantsika mifanampy sy mikolokolo ary miaro ny aina. Ho an’Andriamanitra, dia ny aina no ambon’ny zavatra rehetra, antony nakan'i Jesoa nofo toa antsika sy ny nitsanganany ho velona, hahavelona ny olombelona rehetra ao amin’Andriamanitra. Fomba vaovao atoron'i Jesoa, iainantsika ny lalana izany, mba iainantsika koa ny fomban’Andriamanitra.
Ny fararoa, miharihary tamin’ny Evanjely teo ny tsy finoan'ireto Farisianina an'i Jesoa. Raha nandray an'i Jesoa ho ilay Mesia nampanantenaina izy ireo dia nande sy nanaraka izay nampianariny. Izy ireo anefa no ilay vahoaka voafidy, nahalala ny fomba entin’Andriamanitra mamonjy ny olombelona rehetra, nanomboka hatram’ny fifidianana azy ireo ka hatramin'i Kristy, ilay fahatanterahan’ny lalana sy ny mpaminany. Ao amin'i Kristy no lavorary sy tanteraka ny famonjena antsika olombelona. Noho izany ao Aminy no iorenan’ny finoana. Ny finoana no manokatra ny fo amam-panahintsika handray sy hanatanteraka izay ambaran’Andriamanitra antsika, ary ireny no mampiroso lalindalina antsika hanatona an’Andriamanitra.
