Sabotsy 7 mey 2022 — Herinandro fahatelo fankalazana ny Paka — Ry Jesoa Kristy, vavolombelona mahatoky sy Lahimatoa amin’ny maty, tia anay Ianao, ary nanasa ny helokay tamin’ny Ranao — Evanjely Masina nosoratan'i Masindahy Joany 6, 62-79
Izay mihinana ny nofoko sy misotro ny rako no manana ny fiainana mandrakizay. Voalaza ao amin’ity Evanjely ity fa na dia ireo mpianatra aza dia tsy nahazo ny betsaka tamin’izy ireo ka nilaza hoe sarotra izany teny izany, isika ankehitriny koa dia alaim-panahy hiteny toy izany, ireo mpianatra aza naira-niaina tamin’i Jesoa, nahita azy kanefa dia mbola nahateny izany, vao mainka fa isika tsy mahita azy… sambatra anefa izay tsy mahita ka mino.
Tsy vitan’ny niteny hoe sarotra izany teny zany fotsiny izy ireo fa nimonomonona tao am-pony koa ka fantatr’i Jesoa. Nimonomonona tao am-pony, fanontaniana no napetrany tamin’ireo mpianany hoe manafintohina anareo va izany ? Tsy nisy namaly anefa ireo raha ny momba io fanontaniana io fa i Jesoa ihany nanohy ny teniny nilaza hoe : ny fanahy no mahavelona ny nofo tsy mahasoa ohatr’inona akory. Ny fanahy tokoa no maha olona hoy ny Ntaolo razantsika efa nanana fahendrena lehibe.
