Alakamisy 23 janoary 2020 — Herinandro faharoa mandavantaona — Evanjely Masina nosoratan'i Masindahy Marka 3, 7-12 — Araikao amin'ny fanambarànao ny foko ry Tompo, ary ny lalànao no aoka hanenika ahy.

Ny isarihana ny fandinihantsika voalohany amin'ity Evanjely ity dia ny hoe: tsy mamela an'iza an'iza tsy hanana fanapahan-kevitra ny fisian'i Jesoa fa na momba azy, na manohitra azy. Rehefa momba azy isika, iza marina no fiheverantsika an'i Jesoa? Andriamanitra ivavahana sy hajaina ve? Namana izarana ny tsiambaratelo ve, itokisana sy amborahana ny ao am-po? Ilay tsy mandao sy tsy mahafoy fa eo foana? Sa ilay fitarainana hanalana izay mavesatra fotsiny? Boto faniraka, mpameno ny banga sy mpanentsina ny lavaka? Sa sanatria koa filan-draha tsy mahita? Antsika ny mandinika. Andriamanitra ivavahana Izy.

Maro ireo nanodidina azy, samy nanana ny heviny. Na ny demony aza nibaboka amim-pangovitana hoe: "Ianao no zanak'Andriamanitra". Havaozy sy hamafiso àry, ny finoantsika sy ny fankatovantsika azy ho Tompo sy Mpamonjy. Manasitrana i Jesoa, manala izay mangeja, midika izany fa tapitra hatreo ny fangejan'ilay ratsy. Tsy ny ratsy akory no ho tompon'ny teny farany fa i Jesoa Andriamanitra Mpamonjy.