I Masimbavy Émérentienne na Émérance no tsaroan'ny Fiangonana rehefa 23 janoary. Niaina tamin'ny taonjato fahefatra i Émérentienne, andevo izy, zanak'ilay mpitaiza an'i Masimbavy Agnès. Nibebaka ho kristianina izy noho ny fahitany fiainan'i Agnès izay noraisiny ho toy ny rahavaviny mihitsy. Olona irey ihany moa no nampinono azy mirahavavy ireto.

Nanatrika ny namonoana ho martiry an'i Agnès i Émérentienne. Taorian'ny nahafatesan'i Agnès dia mandeha mivavaka eny amin'ny fasana nandevenana an'i Agnès izy isan'andro. Fantatra tamin'izay fa krisitanina izy, ary notoraham-bato teo amin'ny kibony teo amin'izany fasan'i Masimbavy Agnès izany. Nalevina teo anilan'i Masimbavy Agnès ao amin'ny Basilique Sainte-Agnès-hors-les-Murs ao Roma.

Maro ny fiangonana mitondra ny anaran'i Masimbavy Agnès, fa ny tsaroana etoana dia ny lasapely ao La Pouëze (Maine-et-Loire) sy ny ao amin'ny Institut Notre-Dame-de-Vie (Venasque) izay samy hanajana ity olomasina ity. I Masimbavy Émérentienne ihany koa no mpiaro ny Maisoncelles-du-Maine. Ny sary fanehoana an'i Masimbavy Émérentienne na Émérance dia vehivavy mitondra vato ao anaty aron'akanjo, famantarana ny nitoraham-bato azy teo amin'ny kibony. Antsoina izy raha sendra marary kibo.