31 ôktôbra — Romanina i Quentin ary niaina tamin'ny taonjato fahatelo. Toa an'i Masindahy Crépin sy Crépinien dia nitory ny Vaovao Mahafaly tany Gaule i Quentin. Nampita ny raki-tsarobidin'ny finoana izay noraisiny izy tamin'izany fotoana izany. Tao Amiens no tena ivon'ny fitoriana nataony.
Ny fahagagana nataony no tena nanamafy ny fampianarany. Izany hoe, nanisy mariky ny hazofijaliana tamin'ny mason'ny jamba izy ka nahiratra ireo. Nampiteny ny moana ihany koa i Quentin, nampalady ny marenina izy, ary nampitsangana ny malemy. Izany rehetra izany dia nampitonmbo finoana ireo olona sasany izay nifanerasera taminy. Nefa ihany koa; nampirongatra ny fankahalan'ireo izay tsy tia azy.
Anisan'ireo nanenjika an'i Quentin ny governora romanina tamin'izany fotoana izany, i Rictiovarus. Nantsoin'ity governora ity i Quentin, nanontaniany hoe : "Iza no anaranao ?", dia hoy i Quentin : "Kristianina no fiantsoana ahy, loholona ao Roma ny raiko, ary nomeny anarana hoe Quentin aho". "Olona manana fiandrianana ambony toa izany ianao dia hivarilavo amin'ny finoanoam-poana toy izao", hoy ny governora. Fa hoy i Quentin : "Ny tena fiandrianana dia ny manompo an'Andriamanitra. Ny fivavahana kristianina, tsy finoanoam-poana velively, hoy izy, fa manandratra anay amin'ny fahasambarana tonga lafatra, amin'ny alalan'ny fahalalana an'Andriamanitra, Ray Mahefa ny zavatra rehetra, sy ny Zanany teraka talohan'ny taona rehetra". Dia hoe i Rictiovarus : "Ialao ny hadalanao ary manaova sorona amin'ireto andriamanitra ireto". "Sanatria, hoy i Quentin, demony ireo andriamanitrao ireo. Tena hadalana ny mitsaoka ireo". "Manolora sorona amin'ireto andriamanitra ireto, hoy ihany i Rictiovarus, raha tsy izany ampijaliako mandram-pahafatinao ianao". Fa novalian'i Quentin moramora hoe : "Tsy matahotra aho ! Manana fahefana amin'ny vatako ianao, fa i Kristy kosa mamonjy ny fanahiko". Fampijaliana mahatsiravina no setrin'izany fiekem-pinoana nataon'i Quentin izany. Nefa nankahery ity mpanompony Andriamanitra, ka nisy feo heno avy an-danitra nanao hoe : "Quentin, mahareta fa eo anilanao hatrany aho". Tamin'izay dia nianjera tamin'ny tany ilay mpampijaly azy. Natsipy tao anaty lakavy Quentin avy eo, nefa dia indroa nanafaka azy ny anjely. Tamin'izay izy dia lasa nitory teny teny afovoan'ny tanana ary nahatratra enin-jato by olona nataony batemy.
Vao mainka nampirehitra ny hatezeran'i Rictiovarus, governora, ny fahitana izany asa fitoriana nataon'i Quentin izany, ka nalainy indray io ary nampijaliany tamin'ny kodiarana, ny firitsoka vita tamin'ny vy, ny menaka mangotraka, ny vy mahamay, nikapohana sy nampijaliana azy avokoa izany. "Mpitsara tsy valahara ianao, hoy i Quentin, zanaky ny demony. Ny fampijalianao anefa dia fanafahana ho ahy". Nampian'ny mpanenjika azy indray ny fampijaliana an'i Quentin. Natsongoloka ny vatany, nofantsihana teo anelanelan'ny hohony sy ny nofony ary notapahana ny lohany avy eo. Tamin'izay fotoana izay indrindra, nahita voromailala fotsy, nanidina niakatra ny lanitra ireo nanatrika teo, ka noheverini'izy ireo fa ny fanahin'i Quentin iny, niakatra any amin'ny Ray.
