15 aogositra — Ny Assomption dia fanamarihana ny nanalana na ny nanesorana an’i Masina Maria tety an-tany ho any an-danitra, vatana sy fanahy. Nanomboka tamin’ny kônsily tao Ephèse tamin’ny taona 431 izay nanambarana an’i Masina Maria ho renin’Andriamanitra ny fankalazana.
Notazonina ny daty 15 aogositra nanomboka tamin’ny taonjato fahenina. Andro fety hatrany io teo amin’ny Fiangonana, ary ny Fiangonana tao France aza dia nanomboka tamin’ny tokim-panompoana nataon’i Louis XIII no nankalazana izany, ary ny Fiangonana maneran-tany kosa dia nanomboka tamin’ny taona 1950, taona nanambaran’ny papa Pie XII ny foto-pampianarana momba ny Asssomption. Toa ny fety kristianina rehetra dia tsy maintsy fantarina ny fototra ao amin’ny fiainan’i Kristy. Matoa i Masina Maria amin’izao fotoana izao hajaina sy hankalazaina manokana dia satria izy nanaiky ho renin’ny Mpamonjy ; ilay tovovavy tsotra nanao “eny”, raha nilazan’ny anjely Gabriel fa ho renin’i Kristy. Tsy hita mivantana izy io ao amin’ny Evanjely fa tsy maintsy mandalina sy mamaky tsara vao mahita ny anjara toerany ao amin’izany Vaovao Mahafaly izany. Izay fanambaran’Andriamanitra Ray tamin’ny alalan’ny Kristy Jesoa Zanany izay no ahitana an’i Masina Maria ihany koa ilay teo anilan’ny zanany hatrany, na tao Kana na teo am-pototry ny hazofijaliana. I Masina Maria, ilay mpanompovavin’ny Tompo, araka ny voalaza ao amin’ny tokokiran’i Maria na ny Magnificat. I Maria izay nanjohy hatrany ny fiainan’i Jesoa, izay toy ny mpianany, vehivavy nahay nihaino ny tenin’ny fiainana, sy nanompo azy. I Masina Maria no voalaza fa mpino voalohany fa izy no nino voalohany ny fiavian’i Jesoa Kristy. Ny Assomption izany dia fankalazana ny fandraisan’i Masina Maria ny fiainana mandrakizay.
Miaina ny maha olona feno i Masina Maria afa-tsy ny ota, ny fiainan’ny tovovavy, ny fianan’ny reny, nandalo tamin’ny hafaliana, ny fijaliana, ny fangirifiriana ary mitovy amin’ilay Zanany koa izy amin’izany. Ny fianian’i Masina Maria dia feno ny fisian’Andriamanitra, ny misterin’ny fampiakarana an’i Maria dia famintinana ny fiainan’ny mpino, izany hoe, raha mino an’i Jesoa Kristy nitsagan-ko velona ianao dia voatendry ho an’Andriamanitra, vatana sy fanahy. Ary i Masina Maria no niaina izany voalohany.
